Нозейлин капли глаз. и назал. по 15 мл (флакон)

Дәрілік препаратты медициналық қолдану

жөніндегі нұсқаулық  (Қосымша парақ)

Саудалық атауы

Нозейлин

Халықаралық патенттелмеген атауы

Жоқ

Дәрілік түрі, дозасы

Көзге және мұрынға тамызатын дәрі, 15 мл

Фармакотерапиялық тобы

Сезім мүшелері. Офтальмологиялық препараттар. Деконгестанттар және аллергияға қарсы препараттар. Деконгестанттар ретінде қолданылатын симпатомиметиктер. Басқа препараттармен біріктірілген нафазолин.

АТХ коды S01GA51

Қолданылуы

Офтальмология

- аллергиялық конъюнктивиттер мен кератоконьюнктивиттерді симптоматикалық емдеу.

Ринология

- аллергиялық және вазомоторлы ринитті симптоматикалық емдеу;

- мұрынның қосалқы қуыстарының қабынуын, ортаңғы құлақтың қабынуын симптоматикалық емдеу.

Препарат механикалық және химиялық агенттерден (шаң, бассейндердегі хлорланған суды қоса) туындаған көздің және мұрынның шырышты қабығының тітіркенуі үшін қолданылуы мүмкін.

Қолдануды бастағанға дейін қажетті мәліметтер тізбесі

Қолдануға болмайтын жағдайлар

- нафазолинге, хлорфенираминге немесе қосымша заттардың кез келгеніне аса жоғары сезімталдық;

- атрофиялық ринит;

- жабықбұрышты глаукома;

- ауыр органикалық жүрек-қантамырлық аурулар;

- 12 жасқа дейінгі балалар.

Басқа дәрілік препараттармен өзара әрекеттесуі

Нафазолиннің тамыр тарылтатын әсерінің күшеюіне және айқын артериялық гипертензияның даму қаупінің артуына байланысты препаратты бромокриптинмен, моноаминоксидаза тежегіштерімен және трициклді антидепрессанттармен бір мезгілде қолданбау керек.

Препаратты басқа офтальмологиялық ерітінділермен бірге қолданғанда оларды енгізу арасындағы аралықты кемінде 5 минут сақтау ұсынылады.

Седативті антигистаминдердің алкогольмен біріктірілімі орталық жүйке жүйесіне депрессиялық әсерді күшейтеді. Жергілікті қолданудан кейін осы әсердің даму қаупінің төмен болуына қарамастан, препаратты алкогольді ішімдіктермен және құрамында спирті бар дәрілік заттармен бір мезгілде қолданғанда сақ болу керек.

Арнайы ескертулер

Аллергиялық реакцияның дамуына күдік болған жағдайда препаратпен емдеуді тоқтатқан жөн.

Препаратты ұзақ уақыт қолданған кезде шырышты қабықтың ісінуімен, мұрынмен дем алудың қиындауымен, иіс сезудің бұзылуымен, вазомоторлық ринитпен, бастың ауыруымен көрінетін төзімділіктің (емдеуге реакцияның болмауы) және физикалық тәуелділіктің дамуы байқалуы мүмкін.

Жүйелі симпатомиметикалық әсерлерге байланысты препаратты артериялық гипертензиясы, феохромоцитомасы, жүректің ишемиялық ауруы, аритмиясы, аневризмасы, үдемелі атеросклерозы, қант диабеті, гипертиреозы бар пациенттерге және егде жастағы пациенттерге сақтықпен қолданған жөн.

Аурудың симптомдары 24 сағаттан артық сақталған жағдайда, жай-күйі нашарлаған немесе көз ауырғанда, көру нашарлағанда, көздің ұзақ гиперемиясы пайда болған кезде дәрігерге қаралу керек.

Көз аурулары болған кезде немесе көзге хирургиялық операция жасалған жағдайда, бұл препаратты тек дәрігердің ұсынысы бойынша және бақылауымен қолдану керек.

Қосымша заттар

Бензалконий хлориді

Препараттың құрамында бензалконий хлориді бар, ол көзді тітіркендіруі мүмкін. Жұмсақ жанаспалы линзалармен жанасудан аулақ болу керек, өйткені бензалконий хлориді линзаларға сіңіп, олардың түсінің өзгеруіне әкелуі мүмкін. Препаратты қолданар алдында линзаларды шешіп, тамшыларды көзге тамызғаннан кейін 15 минуттан ерте емес тағу керек.

Жүктілік және лактация кезеңі

Нафазолиннің ықтимал тератогендік әсері туралы деректер жеткіліксіз. Фетальді уыттылық дамығанда тахикардия байқалады. Препаратты жүктілік кезінде препаратты анаға қолданудың болжамды пайдасын және шаранаға ықтимал қаупін ескере отырып, дәрігердің тағайындауы бойынша ғана қолдану ұсынылады.

Препарат емізулі баланың жүрек-қантамыр жүйесіне болжамдыл әсер етуіне орай лактация кезеңінде қолдануға ұсынылмайды.

Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Препаратты көзге тамызғаннан кейін бірнеше минуттан соң көру өткірлігінің ықтимал төмендеуіне байланысты пациент автокөлік жүргізуге немесе механизмдерді басқаруға кіріспес бұрын көру қабілетінің қалпына келуін күтуі керек.

Қолдану жөніндегі нұсқаулар

Дозалау режимі

Офтальмология

Ересектер және 12 жастан асқан балалар

Препаратты әрбір көздің конъюнктивалық қалтасына тәулігіне 3 рет кемінде 4 сағат аралықпен 1 тамшыдан тамызу ұсынылады.

12 жасқа дейінгі балалар

12 жасқа дейінгі балаларға препаратты қолданудың қауіпсіздігі мен тиімділігін зерттеу жүргізілген жоқ.

Ринология

Ересектер және 12 жастан асқан балалар

Препаратты әр танауға тәулігіне 3 рет кемінде 4 сағат аралықпен 2 тамшыдан тамызу ұсынылады.

12 жасқа дейінгі балалар

12 жасқа дейінгі балаларға препаратты қолданудың қауіпсіздігі мен тиімділігін зерттеу жүргізілген жоқ.

Енгізу әдісі және жолы

Препарат офтальмология мен ринологияда жергілікті қолдануға арналған.

Қалпақшаны шешкеннен кейін, егер сақтандыру сақинасы құтының мойнына жабысып тұрмаса, оны препаратты қолданар алдында алып тастау қажет. Құтыны тамшылатқышпен төмен қаратып аударады және құтының қабырғаларына сәл басып, препаратты тамызады.

Құты мен тамшылатқыш ішіндегісінің микробтық ластануын болдырмау үшін тамшылатқыш ұшының көзге, қабаққа немесе қандай да бір беткейлерге тиіп кетпеуін болдырмау керек.

Препаратты әрбір қолданғаннан кейін құтыны тығыздап жабылған түрінде ұстау керек.

Емдеу ұзақтығы

Препарат ұзақ уақыт қолдануға арналмаған. Төзімділіктің дамуын болдырмау үшін препаратты ересектерге 5 күннен артық және балаларға 3 күннен артық қолданбаған жөн.

Артық дозаланған жағдайда қабылдануы тиіс шаралар

Артық дозалану жағдайлары  сипатталмаған.

Артық дозалану қаупі препаратты кездейсоқ жұтып қойған кезде пайда болады (әсіресе кіші жастағы балаларда) және келесі симптомдармен көрінеді: ұйқышылдық, мәңгіру, дене температурасының төмендеуі, жүректің жиырылу жиілігінің баяулауы.

Емі: асқазанды шаю, белсендірілген көмір қабылдау, қажет болған жағдайда симптоматикалық ем және клиникалық мониторинг тағайындайды.

ДП стандартты қолданған кезде байқалатын жағымсыз реакциялардың сипаттамасы және осы жағдайда қабылдауға тиісті шаралар

Офтальмология

Көру мүшелері тарапынан: сирек - айқын көрудің бұзылуы, көзді ашытқандай немесе бөгде зат тұрғандай сезіну, конъюнктиваның хемозы және гиперемиясы, субконьюнктивалық қан кету, мөлдір қабықтың эрозиясы, фотофобия.

Жекелеген жағдайларда аса жоғары сезімталдық реакциялары (эритема, экзема, есекжем), ксеростомия, бас ауыруы, ұйқышылдық байқалды.

Ринология

Жалпы бұзылыстар мен енгізу орнындағы бұзылулар: жергілікті қолданғаннан кейін мұрын қуысының шырышты қабығының өтпелі қышуы мен ашытуы, кейде түшкіру; қолдану жиілігін арттырған кезінде - реактивті гиперемиядан туындаған «мұрынның бітеліп тұрғандай» сезімінің күшеюі; ұзақ қолданған кезде - атрофиялық ринит.

Шамадан тыс дозалар жүйелік әсерлерді туындатады: жоғары артериялық қысым, бас ауыруы, тремор, шаршау, ұйқысыздық.

Жағымсыз дәрілік реакциялар туындаған кезде медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаны қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей жүгіну қажет

Қазақстан Республикасы Денсаулық сақтау министрлігі Медициналық және фармацевтикалық бақылау комитетінің «Дәрілік заттар мен медициналық бұйымдарды сараптау ұлттық орталығы» ШЖҚ РМК

http://www.ndda.kz

Қосымша мәліметтер

Дәрілік препараттың құрамы

1 мл препараттың құрамында

белсенді заттар: 0,5 мг нафазолин гидрохлориді, 0,5 мг хлорфенирамин малеаты,

қосымша заттар: натрий цитраты, бор қышқылы, бензалконий хлориді, динатрий эдетаты, инъекцияға арналған су.

Сыртқы түрінің, иісінің, дәмінің сипаттамасы

Мөлдір түссіз ерітінді

Шығарылу түрі және қаптамасы

15 мл-ден тамшылатқыш қақпақтан және бұралатын пластмасса қалпақшадан тұратын пластик құтыларда. 1 құтыдан медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салынады.

Сақтау мерзімі

3 жыл

Құтыны ашқаннан кейін препаратты 28 күн ішінде пайдалану керек.

Жарамдылық мерзімі өткеннен кейін қолдануға болмайды.

Сақтау шарттары

25°С-ден аспайтын температурада сақтау керек

Балалардың қолы жетпейтін жерде сақтау керек!

Дәріханалардан босатылу шарттары

Рецепт арқылы

Өндіруші туралы мәліметтер

«Уорлд Медицин Илач Сан. ве Тидж. А.Ш.», Түркия

15 Теммуз Мах., Джами Йолу Джад. № 50, Гюнешли, Багджылар, Стамбул

Тел.: +90 (212) 474 70 50

Факс: +90 (212) 474 09 01

е-mail: info@worldmedicine.com.tr

Тіркеу куәлігінің ұстаушысы

«Уорлд Медицин Илач Сан. ве Тидж. А.Ш.», Түркия

15 Теммуз Мах., Джами Йолу Джад. № 50, Гюнешли, Багджылар, Стамбул

Тел.: +90 (212) 474 70 50

Факс: +90 (212) 474 09 01

е-mail: info@worldmedicine.com.tr

Қазақстан Республикасы аумағында тұтынушылардан дәрілік заттардың сапасына қатысты шағымдарды (ұсыныстарды) қабылдайтын жауапты ұйымның атауы, мекенжайы және байланыс деректері (телефон, факс, электрондық пошта)

«RIN Pharm» (РИН Фарм) ЖШС, Қазақстан Республикасы,

Алматы қ., Сүйінбай даңғ., 222 Б

Тел/факс: 8 (7272) 529090

е-mail: rin_pharma@mail.ru

Қазақстан Республикасы аумағында дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электрондық пошта)

«RIN Pharm» (РИН Фарм) ЖШС, Қазақстан Республикасы,

Алматы қ., Сүйінбай даңғ., 222 Б

Ұялы тел +7 701 786 33 98.

е-mail: pvpharma@worldmedicine.kz