Фурадонин Борисовский Змп таблетки по 50 мг №10 (блистер)

Фурадонин

Нитрофурантоин

Таблеткалар 50 мг

Жүйелі пайдалануға арналған инфекцияға қарсы препараттар. Жүйелі қолдануға арналған бактерияға қарсы препараттар. Бактерияға қарсы басқа препараттар. Нитрофуран туындылары. Нитрофурантоин.

АТХ коды J01XE01

Несеп шығару жолдарының бактериялық инфекциялары: жедел асқынбаған инфекциялар, ауыр асқынбаған қайталанатын инфекциялар, несеп шығару жолдарының инфекцияларының профилактикасы, оның ішінде асқынбаған созылмалы аурулар кезінде және урологиялық операциялар немесе қарап-тексерулер кезінде (цистоскопия, несеп шығару жолдарының катетерлеуі және т.б.).

Қолдануды бастағанға дейін қажетті мәліметтер тізбесі

- нитрофурантоинге, нитрофуран туындыларына немесе қосымша заттардың кез келгеніне аса жоғары сезімталдық

- анурия

- олигурия

- бүйректің созылмалы жеткіліксіздігі (креатинин клиренсі 45 мл/мин аз)

- глюкоза-6-фосфатдегидрогеназа тапшылығы

- порфирия

- неврит немесе полинейропатия

- өкпе фиброзы

- II-III сатыдағы жүректің созылмалы жеткіліксіздігі

- бауыр циррозы, созылмалы гепатит

- жүктілік және бала емізу кезеңі

- 12 жасқа дейінгі балалар мен жасөспірімдер (қауіпсіздік және тиімділік бойынша деректердің болмауына байланысты)

Қолданған кездегі қажетті сақтандыру шаралары

Егер сізде шаршау, терінің немесе көздің сарғаюы, қышу, тері бөртпелері, буындардағы ауырсыну, іште жайсыздық, жүрек айну, құсу, тәбеттің болмауы, несептің қараюы және ақшыл немесе сұр түсті нәжіс пайда болса, дәрігерге хабарласыңыз. Бұл бауыр ауруының симптомдары болуы мүмкін.

Анемия, қант диабеті, электролит теңгерімінің бұзылуы, В дәрумені мен фолий қышқылының тапшылығы, өкпе аурулары, бауыр жеткіліксіздігі бар пациенттерде және шеткері нейропатияның дамуына бейім болған жағдайда сақ болу керек.

Невропатия белгілері пайда болған кезде нитрофурантоинді қабылдауды тоқтату керек.

Нитрофурантоинді бүйрек қызметі бұзылған пациенттерде сақтықпен қолдану керек. Нитрофурантоиннің несеппен шығарылуының төмендеуімен оның несептегі бактерияға қарсы концентрациясына қол жеткізілмеуі мүмкін, осылайша қан плазмасындағы концентрация және уыттылық қаупі артуы мүмкін (егер ШСЕЖ<45 мл/мин болса, қолдануға болмайды).

Егде жастағы тұлғалары (65 жаста) және жас пациенттер арасында нитрофурантоинмен емдеуге жауап беруде айтарлықтай айырмашылықтар анықталған жоқ, бірақ егде жастағы адамдарда бүйрек функциясының ықтимал бұзылуына байланысты сақтық ұсынылады.

Ұзақ мерзімді терапия жағдайында өкпенің жұмысын бақылау керек. Пульмонологиялық реакция нашарлауы мүмкін, әсіресе егде жастағы пациенттерде. Фурадонин қабылдауды өкпенің зақымдануының алғашқы белгілерінде тоқтату керек.

Нитрофуран туындыларын қоса, барлық дерлік бактерияға қарсы дәрілермен жалған жарғақшалық колиттің дамуы туралы хабарланды. Нитрофурантоинмен емдеу кезінде жалған жарғақшалық колит туралы хабарламалар болды. Бактерияға қарсы препараттарды қолдану аясында тоқ ішектің табиғи микрофлорасын басу салдарынан диарея дамыған науқастарда осы жағымсыз әсердің пайда болу мүмкіндігін ескеру қажет. Жеңіл дәрежедегі жалған жарғақшалық колитте бактерияға қарсы препаратты қолдануды тоқтату жеткілікті. Жалған жарғақшалық колиттің орташа және ауыр ағымында тиісті емдеу жүргізілуі керек.

Нитрофурантоинмен емдеу кезінде сирек жағдайларда (әсіресе препаратты ұзақ уақыт қолданғанда) микроорганизмдердің резистенттілігі пайда болуы мүмкін. Резистенттілік жағдайында нитрофурантоинді қабылдауды тоқтатып, одан әрі емдеу үшін бактерияға қарсы басқа препаратты таңдау керек.

Нитрофурантоин қабылдаған пациенттерде, егер глюкозаны анықтау үшін мысты қалпына келтіру әдісі қолданылса, несеп глюкозасы жалған оң болуы мүмкін. Егер несептегі глюкозаны анықтау үшін ферменттік әдістер қолданылса, онда нитрофурантоинді қолдану талдау нәтижелеріне әсер етпейді.

Нитрофурантоин метаболиттері несепті қою сары немесе қоңыр түске бояуы мүмкін.

Гепатоуыттылық

Гепатит, аутоиммунды гепатит, холестаздық сарғаю, созылмалы белсенді гепатит және бауыр некрозын қоса, бауыр тарапынан сирек кездеседі. Өліммен аяқталған жағдайлар туралы хабарланды. Созылмалы белсенді гепатиттің басталуы жасырын болуы мүмкін және пациенттерді бауырдың зақымдануын көрсетуі мүмкін биохимиялық тестілердің нәтижелеріндегі өзгерістерді мезгіл-мезгіл бақылау керек. Егер гепатит пайда болса, препаратты қабылдауды дереу тоқтатып, тиісті шараларды қабылдау керек.

Антацидтер мен адсорбенттер нитрофурантоиннің сіңуін төмендетеді.

Подаграға қарсы дәрілер (пробенецид және сульфинпиразон) тиімділікті төмендетеді және нитрофурантоиннің уыттылық қаупін арттырады.

In vitro нитрофурантоин хинолон тобының (налидикс қышқылы, фторхинолондар) препараттарының бактерияға қарсы әсерін әлсіретеді. Бұл препараттарды бір мезгілде қолданудан аулақ болу керек.

Нитрофурантоиннің бактерияға қарсы әсері сілтілі ортада азаяды, сондықтан нитрофурантоинді несептің рН жоғарылататын препараттармен (натрий гидрогенкарбонаты) біріктіру ұсынылмайды.

Емдеу кезінде алкогольдік ішімдіктерді ішуге болмайды, өйткені жағымсыз реакциялар күшеюі мүмкін.

Педиатрияда қолдану: 12 жасқа дейінгі балалар мен жасөспірімдерде қолдану ұсынылмайды (қауіпсіздік пен тиімділік туралы деректердің болмауына байланысты).

Жүктілік және лактация кезеңі.

Нитрофурантоин плацентарлы бөгет арқылы өтіп, емшек сүтіне енеді. Тіпті аз мөлшерде нитрофурантоин балада гемолитикалық анемияны тудыруы мүмкін. Сондықтан бұл препаратты жүкті әйелдер мен бала емізетін аналарға қолдануға болмайды.

Автокөлікті басқару қабілетіне және қозғалмалы механизмдермен жұмыс істеуге әсері.

Фурадонин көлік құралдарын басқару қабілетіне әсер етпейді, бірақ бас айналу, бас ауыруы немесе орталық жүйке жүйесінің басқа жағымсыз әсерлері бар адамдар абай болу керек.

Дозалау режимі

Тамақтану кезінде көп мөлшерде сумен ішіп қабылдау керек.

Жедел асқынбаған инфекция: ересектер - 7 күн ішінде күніне 2 рет 100 мг.

Аурудың симптомдары инфекцияны емдеу басталғанға дейін жойылуы мүмкін және препаратты қолдануды тоқтатқан кезде ауру қайтадан өршуі мүмкін.

Ауыр созылмалы қайталанатын инфекция: ересектер үшін - 7 күн ішінде күніне 3-4 рет 100 мг. Егер жүрек айнуы пайда болса, дозаны азайту немесе қабылдауды тоқтату керек.

Несеп шығару жолдарының инфекцияларының профилактикасы, оның ішінде асқынбаған созылмалы аурулар кезінде және урологиялық операциялар немесе қарап-тексерулер кезінде (цистоскопия, несеп шығару жолдарының катетерлеуі және т.б.): ересектерге - түнде 100 мг.

12 жастан бастап балаларға несеп шығару жолдарының жедел асқынбаған инфекциясында ересектерге арналған дозаларды қолдануға болады.

Енгізу әдісі мен жолы

Тамақтану кезінде көп мөлшерде сумен ішіп қабылдау керек.

Артық дозаланған жағдайда қабылдануы тиіс шаралар

Симптомдары: жүрек айнуы, құсу, бас ауыруы, бас айналуы. Жүйке жүйесі тарапынан қан плазмасындағы нитрофурантоин концентрациясының жоғарылағанын көрсетеді. Полиневриттің дамуы нитрофурантоин мен оның метаболиттерінің жинақталуының салдары болып табылады, сондықтан бүйрек жеткіліксіздігі жағдайында полиневриттің даму қаупі артады.

Емі: несептегі нитрофурантоиннің бөлінуіне ықпал ету үшін сұйықтықты жеткілікті мөлшерде қабылдау қажет. Жедел артық дозаланғанда асқазанды шаюға болады. Нитрофурантоинді диализ арқылы жоюға болады. Спецификалық антидоты жоқ.

Дәрілік препаратты қолдану тәсілін түсіндіру үшін медициналық қызметкеріне кеңес алу үшін жүгіну ұсынылады

Жиі

- жүрек айнуы

- құсу

- тәбеттің болмауы

- бас ауыруы

- ұйқышылдық

- бас айналу

- нистагм

- астения

- аллергиялық реакциялар (тері бөртпелері, есекжем, қышыну)

Жиі емес

- ангионевроздық ісіну

- анафилаксия

Сирек

- іштің ауыруы

- диарея

- панкреатит

- жалған жарғақшалық колит

- гепатит, холестаздық сарғаю (дозаға тәуелсіз және препаратты тоқтатқаннан кейін өтеді)

- бассүйекішілік қысымның жоғарылауы. Кейбір жағдайларда: бауыр функциясының жеткіліксіздігі, анемия, қант диабеті, электролит теңгерімсіздігі, В дәрумендерінің жетіспеушілігі бар пациенттерде ауыр шеткері полинейропатиялар болуы мүмкін, олардың алғашқы симптомдары – аяқтағы ұйю және ашыту сезімі, бұлшықет әлсіздігі. Аталған симптомдарда препаратты қабылдауды тоқтату керек.

- сілекей бездерінің қабынуы, эксфолиативтік дерматит, полиморфты эритема.

- аутоиммунды реакциялар, негізінен өкпенің немесе бауырдың созылмалы өзгеруіне байланысты. Бұл қызылжегі тәрізді синдромның симптомдары - бөртпе, эозинофилия, қызба, артралгия, қысқа мерзімді эозинофилия, сонымен бірге қан сарысуында кем дегенде екі параметрдің жоғарылауы байқалады – антинуклеарлық антиденелер, тегіс бұлшықетке немесе шумақтық базальді жарғақшаға антиденелер және Кумбс реакциясы.

- мегалобластық анемия

- лейкопения

- гранулоцитопения немесе агранулоцитоз

- тромбоцитопения

- глюкоза-6-фосфатдегидрогеназа тапшылығы бар пациенттерде гемолиздық анемия

- буындардағы ауырсыну

- шаштың қайтымды түсуі

Өте сирек

- сперматогенездің өтпелі бұзылуы

Белгісіз

- аутоиммунды гепатит

- терінің зақымдануын тудыратын ұсақ қан тамырларының қабырғаларының қабынуы

- иммундық жүйенің бауыр жасушаларына қарсы айналуына байланысты бауырдың қабынуы

- бүйрек жеткіліксіздігін тудыратын түтікшелерді қоршап тұрған бүйрек тінінің қабынуы

- жалған жарғақшалы колит

- қызба, эозинофилия, жөтел, кеуденің ауырсынуы, ентігумен сипатталатын өкпенің жоғары сезімталдығының жедел және созылмалы реакциялары. Өкпеде интерстициальді өзгерістер, бронхобструктивті синдром болуы мүмкін. Өкпе инфильтраты немесе тығыздау және плевралық жалқық ем басталғаннан кейін бірнеше сағат немесе күн ішінде пайда болуы мүмкін; препаратты тоқтатқаннан кейін олар әдетте ериді. Жеделге жуық немесе жедел өкпе симптомдары, соның ішінде өкпе фиброзы, ұзақ мерзімді ем кезінде науқастарда байқалмай дамуы мүмкін; фиброз қайтымсыз болуы мүмкін, әсіресе емдеу симптомдар басталғаннан кейін жалғасса. Өкпенің жоғары сезімталдығының алғашқы реакциялары пайда болған кезде препаратты қабылдауды тоқтату керек.

- тері васкулиті

- интерстициальді нефрит

Инфекциялар мен инвазиялар

Нитрофурантоинмен емдеу кезінде жалған жарғақшалы колит туралы хабарламалар болды. Жеңіл жағдайларда препаратты қабылдауды тоқтату әдетте жеткілікті. Орташа және ауыр жағдайларда тиісті емдеу жүргізу қажет.

Препаратты тамақпен және көп сұйықтықпен қабылдаған кезде жағымсыз әсерлердің жиілігі төмендейді.

Жағымсыз дәрілік реакциялар туындаған кезде медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаны қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей жүгіну қажет

Қазақстан Республикасы Денсаулық сақтау министрлігі Медициналық және фармацевтикалық бақылау комитетінің «Дәрілік заттар мен медициналық бұйымдарды сараптау ұлттық орталығы» ШЖҚ РМК

http://www.ndda.kz

Қосымша мәліметтер

Бір таблетканың құрамында:

белсенді зат – нитрофурантоин (фурадонин) – 50 мг;

қосымша заттар: сусыз коллоидты кремнийдің қостотығы, кальций стеараты, картоп крахмалы.

Жалпақ цилиндр пішінді сары немесе жасылдау-сарғыш түсті ойығы бар таблеткалар.

10 таблеткадан қағаз және картон негізінде біріктірілген материалдан жасалған пішінді ұяшықсыз қаптамаға салынады.

Медициналық қолдану жөніндегі қазақ және орыс тілдеріндегі нұсқаулықтардың тиісті санымен бірге пішінді ұяшықсыз қаптамалар (қорапшаға салмай) гофрленген картоннан жасалған қорапқа салынады.

Медициналық қолдану жөніндегі нұсқаулықтар саны қаптама санына сәйкес болуы тиіс.

10 таблеткадан поливинилхлоридті үлбірден немесе пластификацияланбаған ПВХ үлбірінен және алюминий фольга немесе біріктірілген материал негізінде алюминий фольгадан немесе икемді қаптамадан пішінді ұяшықты қаптамаға.

2 пішінді ұяшықты қаптамадан медициналық қолдану жөніндегі қазақ және орыс тілдеріндегі нұсқаулықпен бірге картон қорапшаға салынады.

4 жыл

Жарамдылық мерзімі өткеннен кейін қолдануға болмайды!

Құрғақ, жарықтан қорғалған жерде, 25 °С-ден аспайтын температурада сақтау керек.

Балалардың қолы жетпейтін жерде сақтау керек!

Рецепт арқылы

«Борисов медициналық препараттар зауыты» ашық акционерлік қоғамы, Беларусь Республикасы, Минск облысы, Борисов қ., Чапаев к-сі 64,

тел/факс +375 (177) 734043

Е-mail: market@borimed.com

Тіркеу куәлігін ұстаушысы

«Борисов медициналық препараттар зауыты» ашық акционерлік қоғамы, Беларусь Республикасы. Борисов қ., Чапаев к-сі, 64,

тел/факс +375 (177) 734043

Е-mail: market@borimed.com

Қазақстан Республикасы аумағында тұтынушылардан дәрілік заттардың сапасына қатысты шағымдарды (ұсыныстарды) қабылдайтын және  дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

«LEKARSTVENNAYA BEZOPASNOST (Лекарственная безопасность)» ЖШС

Қазақстан Республикасы, 050047, Алматы қ., Алатау ауданы, Саялы ықшам ауданы, 16 үй, 8 пәтер, тел.: +7 777 064 27 02, +7 499 504 15 19.

Е-mail: kazakhstan@drugsafety.ru, adversereaction@drugsafety.ru