Акридерм крем д/наруж. прим. 0,05% по 15 г (туба)

Дәрілік препаратты медициналық қолдану

жөніндегі нұсқаулық (Қосымша парақ)

Саудалық атауы

Акридерм Santo

Халықаралық патенттелмеген атауы

Бетаметазон

Дәрілік түрі, дозасы

Сыртқа қолдануға арналған крем, 0.05 %

Фармакотерапиялық тобы

Дерматология. Кортикостероидтар, дерматологиялық препараттар. Кортикостероидтар қарапайым. Айқын белсенділігі бар кортикостероидтар (III топ).Бетаметазон.

АТХ коды: D07АC01

Қолданылуы

Дәрілік препарат ересектерде, жаңа туған нәрестелерде, сәбилерде, балаларда, 0-ден 18 жасқа дейінгі жасөспірімдерде қолдануға арналған.

1. Кортикостероидтармен сырттай емдеудің оңтайлы әдісі болып табылатын қолайлы қолданылуы:

· жанаспалы дерматит

· атопиялық дерматит

· лихенизация

2. Қолданылуы кортикостероидтармен сырттай емдеу кезінде стандартты емдеу әдістерінің бірі болып табылады:

· варикозды дерматит

· псориаз (жалпы бөртпелерді қоспағанда)

· теміреткі

· паразиттік аурулармен байланысты емес қышыну

· дисгидроз

·  вульваның склероатрофиялық лихені

· сақина тәрізді гранулема

· дискоидті қызыл жегі

· себореялы дерматит, бет терісіндегі бөртулерден басқа

· зеңдік микоз кезінде қышынудың симптоматикалық емі

3. Препараттың қысқа мерзімді қолданылуы:

· этиотропты ем аяқталғаннан кейін жәндіктердің шағуы және паразиттік аурулардан туындаған қышыну.

Крем түріндегі препарат аурудың жедел кезеңінде сулататын бөртулерді емдеуге арналған.

Ескерту: әр дерматозды емдеу үшін тиісті белсенділік дәрежесіндегі кортикостероидты қолдану керек және барлық бөртпелерді немесе олардың бір бөлігін ғана өңдей отырып, емдеу нәтижелеріне байланысты оны белсенділігі жоғары немесе төмен дәрежелі препаратпен алмастыру керек.

Қолданудың басталуына дейінгі қажетті мәліметтер тізбесі

Қолдануға болмайтын жағдайлар

- Әсер етуші затқа немесе Акридерм Santo препараттының қосымша заттарының кез келгеніне аса жоғары сезімталдық.

- Бактериялық, вирустық, зеңдік немесе паразиттік бастапқы инфекциялар.

- Ойық жаралы зақымданулар.

- Акне.

- Розацеа.

- Қабақтың терісіне жағу (глаукоманың даму қаупі).

Басқа дәрілік препараттармен өзара әрекеттесуі

Осы препараттың сыртқы қолданылуын ескере отырып: бетаметазонды ұсынылған дозаларда қолданған кезде басқа дәрілік препараттармен клиникалық маңызды өзара әрекеттесулердің даму ықтималдығы аз.

Арнайы ескертулер

Бет терісіне өте жоғары дәрежелі кортикостероидтарды ұзақ уақыт жағу, препаратты әр тоқтатқаннан кейін қайталанатын кортикостероид-индукцияланған және парадоксальды түрде кортикостероидқа сезімтал дерматиттің дамуына әкелуі мүмкін. Препаратты біртіндеп тоқтату қажет, бұл күрделі міндет болып табылады.

Бұл дәрі-дәрмектің құрамында метилпарагидроксибензоат бар және аллергиялық реакцияларды тудыруы мүмкін (соның ішінде кешіктірілген).

Бұл препараттың құрамында пропиленгликоль бар және теріні тітіркендіруі мүмкін.

Балаларда қолдану

Кортикостероидтар жүйелі қан ағымына енетіндіктен, препаратты тері беткейінің үлкен аумағына немесе окклюзиялық таңғыштың астына қолдану жүйелі кортикостероидты емнің жағымсыз құбылыстарын тудыруы мүмкін, әсіресе сәбилер мен жас балаларда. Бұл құбылыстарға Кушинг синдромы және бой өсуінің тежелуі жатады. Олар препаратты тоқтатқаннан кейін басылады, бірақ емді күрт тоқтату бүйрек үсті безінің жедел жеткіліксіздігінің дамуына әкелуі мүмкін.

Сақтық шаралары

Акридерм Santo препараты офтальмологияда қолдануға арналмаған.

Жаңа туған нәрестелерге белсенділігі жоғары дәрежедегі глюкокортикоидтарды тағайындауға болмайды. Ерекше сақтық таныту және терінің табиғи қатпарларында немесе киім қабаттарының астында пайда болуы мүмкін кездейсоқ окклюзия ықтималдығын ескеру қажет.

Сыртқы кортикостероидтармен емдеуге сезімтал дерматоздардың салдарлы бактериялық немесе зеңдік инфекция жұқтыруы кезінде оларды қолданар алдында этиотропты ем жүргізілуі керек.

Жергілікті жақпаушылық құбылыстары дамыған кезде емді тоқтату және себебін анықтау үшін тексеру жүргізу керек.

Жергілікті және жүйелі қолдануға арналған кортикостероидтарды қолданған кезде (атап айтқанда, мұрынға, ингаляцияға және офтальмологиялық қолдануға арналған препараттар) көрудің бұзылуы дамуы мүмкін. Кортикостероидтармен емдеу аясында көрудің бұлыңғырлануы немесе көру ағзасының зақымдануының кез келген басқа симптомдары пайда болған кезде көрудің бұзылуын, атап айтқанда катаракта, глаукома немесе жүйелік немесе жергілікті кортикостероидтарды қолдану кезінде сипатталған орталық серозды хориоретинопатия сияқты сирек жағдайларды анықтау үшін офтальмологиялық тексеру қажет.

Жүктілік кезінде және бала емізу кезеңінде қолдану

Сыртқы қолдануға арналған кортикостероидтардың тератогенділігі бойынша зерттеулер жүргізілген жоқ.

Ішке қабылдауға арналған кортикостероидты зерттеулер ақаулардың пайда болу қаупі жалпы популяцияда бұл қауіптен аспады.

Ішке қабылдауға арналған кортикостероидтарды қолданған кезде бала емізуді тоқтату керек, өйткені бұл препараттар емшек сүтімен бөлінеді.

Сыртқа қолдану кезінде тері арқылы ену, яғни, емшек сүтімен кортикостероидтың бөліну қаупі препарат жағылатын тері беткейінің аумағына, эпидермистің зақымдану дәрежесіне және емдеу ұзақтығына байланысты болады.

Көлік құралын немесе қауіптілігі зор механизмдерді басқару қабілетіне әсер ету ерекшеліктері

Қатысты емес.

Қолдану бойынша ұсынымдар

Дозалау режимі

Препаратты теріге тәулігіне 1-2 реттен асырмай жағу керек.

Емдеу ұзақтығы

Препараттың аз мөлшерін терінің зақымданған бөлігіне, оны толық сіңгенге дейін жеңіл массаж қимылдарымен тарата отырып жағу ұсынылады.

Кейбір дерматоздар (псориаз, атопиялық дерматит және т.б.) кезінде препаратты біртіндеп тоқтату керек. Мұны жағу жиілігін азайту және/немесе белсенділік дәрежесі төменірек немесе құрамында әсер етуші заттың аз дозасы бар препаратты пайдалану арқылы жасауға болады.

Артық дозалану жағдайында қабылдануы қажетті шаралар

Симптомдары

Жергілікті кортикостероидтарды шамадан тыс немесе ұзақ уақыт қолдану гипофиз-бүйрек үсті безінің функциясының ауырлатуына әкелуі мүмкін және бүйрек үсті безінің қыртысының қайталамалы жеткіліксіздігінің дамуына және Кушинг синдромын қоса, гиперкортицизм симптомдарына әкелуі мүмкін.

Емі

Тиісті симптоматикалық ем көрсетілген. Гиперкортицизмнің жедел симптомдары әдетте қайтымды. Қажет болған кезде, электролитті бұзылуларды түзету керек. Созылмалы уытты әсер кезінде кортикостероидтарды біртіндеп алып тастау ұсынылады.

Дәрілік препаратты қолдану тәсілін түсіндіру үшін медицина қызметкерінің кеңесіне жүгіну бойынша нұсқаулар

Дәрілік препаратты қабылдамас бұрын кеңес алу үшін дәрігерге немесе фармацевтке жүгініңіз.

ДП стандартты қолдану кезінде пайда болатын жағымсыз реакциялардың сипаттамасы және бұл жағдайда қабылдануы керек шаралар

Белсенділігі жоғары дәрежелі кортикостероидтарды ұзақ уақыт қолдану терінің атрофиясына, телангиэктазияның пайда болуына (әсіресе бет терісінде), стрияларға (әсіресе аяқ-қолдың бөлігінің проксималды терісінде, жасөспірімдерде жиі туындайды), терінің атрофиясымен байланысты экхимоздарға, сондай-ақ терінің жеңіл жарақаттануына әкелуі мүмкін.

Бет терісіне сыртқы кортикостероидтарды жаққан кезде пероральді дерматиттің дамуы немесе розацея көріністері нашарлауы мүмкін.

Баяу жаралар, тесілулер, сирақтың ойық жараларының, төменгі аяқтың жараларының кеш жазылуы байқалуы мүмкін.

Жүйелік құбылыстар дамуы мүмкін.

Безеу немесе пустулезді бөртпе, гипертрихоз, терінің депигментациясының даму жағдайлары тіркелді.

Сондай-ақ, сыртқы кортикостероидтарды қолдану аясында қайталамалы инфекция жұқтыру (әсіресе окклюзиялық таңғыш астында немесе тері қатпарларында) және аллергиялық жанаспалы дерматит жағдайлары байқалды.

Кортикостероидтарды қолдану кезінде көрудің бұлыңғырлану жағдайлары тіркелді (жиілігі белгісіз).

Жағымсыз дәрілік реакциялар туындаған кезде медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаларды қоса алғанда, дәрілік препараттарға жағымсыз реакциялар (әрекеттер) бойынша тікелей ақпараттық дерекқорға жүгіну

Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК

http://www.ndda.kz

Қосымша мәліметтер

Дәрілік препараттың құрамы

100 г кремнің құрамында

белсенді зат - бетаметазон дипропионаты (микрондалған бетаметазон дипропионаты) 100 % затқа шаққанда 0.064 г, бұл 0.05 г бетаметазонға баламалы.

қосымша заттар: метилпарагидроксибензоат (нипагин), қатты парафин, вазелин, пропиленгликоль, сұйық парафин (вазелин майы), эмульсиялық балауыз, динатрий эдетаты (трилон Б), сусыз натрий сульфиті, тазартылған су.

Сыртқы түрінің, иісінің, дәмінің сипаттамасы

Ақ немесе ақ дерлік түсті крем.

Шығарылу түрі және қаптамасы

15 г немесе 30 г алюминий немесе импорттық сықпада.

1 сықпадан медициналық қолдану жөніндегі қазақ және орыс тіліндегі нұсқаулықпен бірге картон қорапшаға салынады.

Сақтау мерзімі

4 жыл

Жарамдылық мерзімі өткеннен кейін қолдануға болмайды!

Сақтау шарттары

15 оС-ден 25 оС-ге дейінгі температурада.

Балалардың қолы жетпейтін жерде сақтау керек!

Дәріханалардан босатылу шарттары

Рецепт арқылы

Өндіруші туралы мәліметтер

«АКРИХИН» химия-фармацевтикалық комбинаты» акционерлік қоғамы («АКРИХИН» АҚ), Ресей

142450, Мәскеу облысы, Богородский қ.о., Старая Купавна қ., Киров көш., 29 үй, 3 құр.

Телефон/факс: +7 (495) 702-95-03

Электронды пошта: info@akrikhin.ru

Тіркеу куәлігінің ұстаушысы

«Химфарм» АҚ, Қазақстан Республикасы, Шымкент қ., Рашидов көш., 81

Телефон нөмері +7 7252 (610151)

Автожауап бергіш нөмірі +7 7252 (561342)

Электронды пошта: complaints@santo.kz

Қазақстан Республикасының аумағында тұтынушылардан дәрілік заттардың сапасы жөнінде шағымдарды (ұсыныстарды) қабылдайтын және дәрілік заттың қауіпсіздігін тіркеуден кейінгі бақылауға жауапты ұйымның атауы, мекенжайы және байланыс деректері (телефон, факс, электронды пошта)

«Химфарм» АҚ, Қазақстан Республикасы, Шымкент қ., Рашидов көш., 81

Телефон нөмірі +7 7252 (610150)

Автожауап бергіш нөмірі +7 7252 (561342)

Электронды пошта phv@santo.kz; infomed@santo.kz