Лоринден С мазь д/нар. прим. по 15 г (туба)

Жақпамай, 15 г

Дерматология. Кортикостероидтар, дерматологиялық препараттар. Антисептиктермен біріктірілген глюкокортикостероидтар. Антисептиктермен біріктірілген  белсенділігі орташа глюкокортикостероидтар. Антисептиктермен біріктірілген флуметазон.

АТХ коды D07BB01

Жақпамай түріндегі Лоринден® С терінің құрғақ қабыну жағдайларында, гиперкератоз және басылмайтын қышынумен қатар жүретін асқынған салдарлы бактериялық инфекцияларда, әсіресе аллергия аясында жергілікті қолданылады:

- себореялық дерматит

- атопиялық дерматит

- папулездік есекжем

- аллергиялық жанаспалы экзема

- мультиформалы эритема

- қызыл жегі

- ұзаққа созылатын псориаз

Қолдануды бастағанға дейін қажетті мәліметтер тізбесі

- глюкокортикостероидтарға, клиохинолға және препарат негізінің компоненттеріне жоғары сезімталдық

- терінің бактериялық, вирусты және зеңді инфекциялары

- желшешек, қарапайым герпес

- тері туберкулезі

- вакцинадан кейінгі реакциялар

- вульгарлы және қызғылт безеулер

- мерездің терілік түрі

- терідегі жаңа түзілімдер

- периоральді дерматит

- анус аумағының қышуы

- тері ауруларының суланатын және экссудативті сатылары

- флебиттер (веналардың варикозды кеңеюі аясында), трофикалық ойық жара

- тері ақауы бар (күйіктер) тері жабындыларының ауқымды зақымданулары

- жүктіліктің I триместрі

- 2 жасқа дейінгі балалар

- жөргектік дерматит

Препаратты ұзақ қолданудан аулақ болу керек. Дененің ауқымды бетіне ұзақ қолданғанда жағымсыз әсерлердің туындау жиілігі артады. Лоринден® С жергілікті қолданудың нәтижесінде гипофиз-бүйрек үсті безі осінің бәсеңдеуі есебінен адренокортикотропты гормонның (АКТГ) гипофизбен бөлінуі төмендеуі мүмкін, қандағы кортизол деңгейі төмендейді және емді тоқтатқаннан кейін жойылатын Кушингтің  ятрогенді синдромы туындауы мүмкін. АКТГ бүйрек үсті безінің стимуляциясынан кейін қандағы және несептегі кортизолды анықтау жолымен бүйрек үсті безі қыртысының жұмысын мезгіл-мезгіл бақылап отыру ұсынылады.

Жақпамай жағылған орында инфекция пайда болған жағдайда бактерияға қарсы немесе зеңдерге қарсы сәйкесінше емді қолданған жөн. Егер симптомдары жойылмаса, жақпамайды қолдануды инфекция жазылған уақытқа дейін тоқтата тұру керек.

Препаратты көзге және қабаққа немесе қабақ аумағының терісіне, ашық жараларға және шырышты қабыққа тигізіп алудан аулақ болыңыз. Препарат көзге немесе шырышты қабыққа тиген жағдайда оларды жеткілікті мөлшердегі сумен шаю ұсынылады. Жүйелі глюкокортикостероидтарды қолдану жағдайындағыдай, препаратты сыртқа қолданғаннан кейін катаракта және глаукома немесе орталық сероздық хориоретинопатия (ОСХ) сияқты сирек ауру дамуы мүмкін.

Көру қабілетінің бұзылуы кортикостероидтарды жүйелі және жергілікті қолдану нәтижесінде пайда болуы мүмкін. Егер пациентте көру бұлдырауы немесе көрудің басқа да бұзылулары сияқты симптомдар пайда болса, кортикостероидтарды жүйелі және жергілікті қолданғаннан кейін хабарланған катаракта, глаукома немесе орталық серозды хориоретинопатия (ОСХ) сияқты сирек ауруларды қоса алғанда, ықтимал себептерді анықтау үшін офтальмологқа жүгіну керек.

Бет терісіне, сондай-ақ қолтық асты және шап аумақтарының терісіне препаратты қысқа уақыт қолданғаннан кейін де сіңірілуінің ұлғаюына және жағымсыз әсерлердің (телеангиэктазия, периоральді дерматит) пайда болуының үлкен мүмкіндігіне байланысты өте қажетті жағдайларда ғана қолдануға болады.

Окклюзиялық таңғыштың астына жақпа қолдануға болмайды, өйткені бұл эпидермистің атрофиясына, ағуларға және суперинфекцияға әкелуі мүмкін. Тері астындағы тіндердің бұрыннан бар атрофиялық жағдайларында, әсіресе егде жастағы адамдарда абайлап қолданыңыз.

Псориазбен ауыратын пациенттерде әсіресе мұқият қолданылады, өйткені псориазда кортикостероидтарды жергілікті қолдану бірқатар себептерге байланысты қауіпті болуы мүмкін, оның ішінде төзімділіктің дамуына байланысты қайталану, жалпыланған пустулярлы псориаз қаупі және терінің бұзылуына байланысты терінің тұтастығының бұзылуынан туындаған жалпы уытты әсерлер.

Жергілікті қолданылатын клиохинолдың нейроуытты қаупі бар, әсіресе Лоринден ® С жақпамайы ұзақ уақыт бойы немесе окклюзиялық таңу кезінде пайдаланылғанда.

Глюкокортикостероидтарды жергілікті қолданғанда басқа дәрілік заттармен өзара әрекеттесу жағдайлары белгісіз.

Препаратпен емдеу кезінде иммунологиялық тапшылық пайда болу қаупіне байланысты шешекке қарсы екпе және иммунизацияның басқа түрлерін жүргізбеу керек.

Лоринден® С жақпамайы иммуносупрессорлық дәрілердің әсерін күшейтуі және иммунитет көтермелейтін дәрілердің әсерін төмендетуі мүмкін.

Балаларда қолдану

2 жастан асқан балаларда сақтықпен қолданылады.

Балаларда ересектермен салыстырғанда дене бетінің дене салмағына қатынасының жоғарылығына байланысты гипоталамус-гипофиз-бүйрекүсті осінің белсенділігі тежелуі мүмкін және өсу және дамудың бұзылуын қоса, кортикостероидтарға тән жағымсыз әсерлер пайда болуы мүмкін.

Жүктілік және лактация кезеңі

Лоринден® С жақпамайын жүкті әйелдерге, егер күтілетін пайда препаратты қолданудан  болатын ықтимал қауіптен жоғары болса ғана, терінің шағын беткейіне қысқа мерзімге қолдануға болады. Препаратты жүктіліктің бірінші триместрінде қолдануға болмайды.

Емшек емізу кезінде Лоринден ® C қолданғанда ерекше назар аудару керек. Балалардағы жағымсыз әсерлердің мүмкіндігі және ана үшін емдеудің артықшылықтары ескерілуі керек. Жергілікті қолданылатын кортикостероидтардың бала емізетін әйелдердің емшек сүтіне енуі мүмкін дәрежеге дейін тері арқылы сіңірілетіні анықталған жоқ. Флуметазон пивалатының теріге жаққаннан кейін емізетін әйелдердің сүтіне ену дәрежесі белгісіз.

Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Лоринден® С жақпамайы көлік құралдарын басқаруға және қозғалатын  механикалық құрылғылар қызметін көрсету қабілетіне әсер етпейді.

Дозалау режимі

Жақпамайдың  жұқа қабатын зақымданған тері бөліктеріне жиі дегенде тәулігіне 1-2 рет жағады. Бір апта ішінде 15 г (1 сықпа) артық емес жақпамай қолдануға болады.

Енгізу әдісі мен жолы

Лоринден®С сыртқа қолданылады.

Жақпамайдың  жұқа қабаты зақымданған тері бөліктеріне жағылады. Зардап шеккен терінің шамадан тыс теміреткі немесе шамадан тыс кератоз жағдайында окклюзиялық таңғышты қолдануға болады, оны әр 24 сағат сайын ауыстырып отыру керек.

Емдеу үзіліссіз 2 аптадан артық созылмауы тиіс.

Бет терісіне 7 күннен артық қолдануға болмайды.

Артық дозаланған жағдайда қабылдануы тиіс шаралар

Симптомдары - ісіну, гипертония, иммунитеттің төмендеуі сияқты жағымсыз әсерлердің күшеюі, ал ауыр жағдайларда Кушинг ауруы пайда болуы мүмкін.

Емі - препаратты тоқтату және құрамында глюкокортикостероидтар мөлшері аз емді қолдану.

Дәрілік препаратты қолдану тәсілін түсіндіру үшін медициналық қызметкерге кеңес алуға жүгінуге ұсынамыз.

Белгісіз

Тері және тері асты тіндері тарапынан бұзылулар

Келесі симптомдар дамуы мүмкін: акне тәрізді симптомдары, постстероидты пурпура, эпидермальді және тері астындағы тіндердің атрофиясы, құрғақ тері, гирсутизм немесе алопеция, гипопигментация немесе терінің түсінің өзгеруі, тері мен стрияның атрофиясы, телеангиэктазия, ауыз айналасындағы терінің қабынуы, фолликулит, қайталама инфекция, терінің тітіркенуі. Кейде уртикария, макулопапулярлы бөртпе немесе бар зақымданулардың өршуі мүмкін.

Көру мүшелері тарапынан бұзылулар

Анық емес көру

Препаратты қабақтың терісіне қолданғанда кейде глаукома немесе катаракта пайда болуы мүмкін.

Жалпы бұзылыстар және енгізу орнындағы бұзылулар

Белсенді заттардың қанға сіңуі нәтижесінде флуметазон пивалатының жүйелі жағымсыз реакциялары да дамуы мүмкін. Олар негізінен препаратты ұзақ уақыт қолданғанда, терінің үлкен аймағына қолданғанда, окклюзиялық таңғыштың астында немесе балаларда қолданғанда анықталады.

Кортикостероидтарға тән флуметазон пивалатының жүйелік жағымсыз әсерлеріне гипоталамус-гипофиз-бүйрек үсті осінің белсенділігін тежеу, Кушинг синдромы, балалардағы өсу мен дамуды тежеу, гипергликемия, глюкозурия, ісіну, гипертония, иммунитеттің төмендеуі жатады.

Жағымсыз дәрілік реакциялар туындаған кезде медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаны қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей жүгіну қажет

Қазақстан Республикасы Денсаулық сақтау министрлігі Медициналық және фармацевтикалық бақылау комитетінің «Дәрілік заттар мен медициналық бұйымдарды сараптау ұлттық орталығы» ШЖҚ РМК.

http://www.ndda.kz

Қосымша мәліметтер

Бір грамм жақпамайдың құрамында

белсенді заттар: флуметазон пивалаты 0,20 мг, клиохинол 30,00 мг

қосымша заттар: ақ балауыз, ақ жұмсақ парафин.

Сары немесе сұр реңді ақ түсті майлы масса. Кристалдардың жекелеген жұмсақ шоғыры болуына жол беріледі.

15 г препараттан ішкі беткейі лакталған және пластикалық қақпағы бар алюминий сықпаға салынады.

Бір сықпадан медициналық қолдану жөніндегі қазақ және орыс тілдеріндегі нұсқаулықпен бірге картон қорапшаға салынады.

3 жыл

Жарамдылық мерзімі өткеннен кейін қолдануға болмайды!

25°С-ден аспайтын температурада сақтау керек.

Балалардың қолы жетпейтін жерде сақтау керек!

Рецепт арқылы

Фармзауыт Jelfa А.Қ.

58-500, Еленя Гура, В. Поля к-сі, 21, Польша

Тел.+48 75 64 33 100 Факс: +48 75 752 44 55

Электронды пошта: Jelfa@valeant.com

«Бауш Хелс» ЖШҚ

115162, Ресей, Мәскеу қ., Шаболовка к-сі, 31 үй, 5 құр.

Тел. / факс: +7 495 510 2879

Электронды пошта: office.ru@bauschhealth.com

Қазақстан Республикасы аумағында тұтынушылардан дәрілік заттардың сапасына қатысты шағымдарды (ұсыныстарды) қабылдайтын және  дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

«Бауш Хелс» ЖШС

Қазақстан Республикасы, Алматы қ., A26T9G0, Қажы Мұқан к-сі, 22/5 үй

Телефоны + 7 727 3 111 516, факс +7 727 3 111 517

Электронды пошта: office.kz@bauschhealth.com