Эритромицин Биосинтез таблетки по 250 мг №10 (банка)

Эритромицин

Эритромицин

Ішекте еритін қабықпен қапталған таблеткалар, 250 мг

Жүйелі пайдалануға арналған инфекцияға қарсы препараттар. Жүйелі қолдануға арналған бактерияға қарсы препараттар. Макролидтер, линкозамидтер және стрептограминдер. Макролидтер. Эритромицин.

АТХ коды J01FA01

Препарат ересектер мен 8 жастан асқан балаларда қолдануға арналған.

Эритромицинге сезімтал микроорганизмдер туындататын инфекциялық-қабыну ауруларының профилактикасы және емдеу:

- жоғарғы тыныс алу жолдарының инфекциялары: тонзиллит, паратонзиллярлық абсцесс, фарингит, ларингит, синусит, тұмау мен суық тию кезіндегі салдарлы инфекциялар

- төменгі тыныс алу жолдарының инфекциялары: трахеит, жедел және созылмалы бронхит, пневмония (бөліктік пневмония, бронхопневмония, бастапқы атипиялық пневмония), бронхоэктазалар, легионеллез (легионерлер ауруы)

- ЛОР-мүшелерінің инфекциясы: сыртқы отит, ортаңғы отит, мастоидит

- ауыз қуысының инфекциялары: гингивит, Венсан баспасы

- көру мүшелерінің инфекциялары: блефарит

- тері мен жұмсақ тіндердің инфекциялары: фурункулдар мен карбункулдар, паронихия, абсцесстер, папула-пустулезді акне, импетиго, целлюлит, тілме

- асқазан-ішек жолының инфекциялары: холецистит, стафилококкты энтероколит

- инфекциялардың профилактикасы: операцияға дейінгі және операциядан кейінгі кезеңдердегі ішекке жасалған операциялар, күйіктер, ревматизмдік қызба кезінде

- басқа инфекциялар: күл, скарлатина, остеомиелит, уретрит, простатит, соз, мерез, венериялық лимфогранулема

Қолдануды бастағанға дейін қажетті мәліметтер тізбесі

Қолдануға болмайтын жағдайлар

- белсенді затқа (заттарға) немесе кез келген қосымша заттарға аса жоғары сезімталдық

- симвастатинді, толтеродинді, мизоластинді, амисульпридті, астемизолды, терфенадинді, домперидонды, цизапридті және пимозидті бір мезгілде қабылдау

- тамыр тарылтатын қастауыш алкалоидтарын, әсіресе эрготамин мен дигидроэрготаминді бір мезгілде қабылдау

- ломитапидті бір мезгілде қабылдау

- бауыр функциясының ауыр бұзылулары

- тұқым қуалайтын фруктоза көтере алмаушылығы, Lapp-лактаза ферментінің тапшылығы, глюкоза-галактоза мальабсорбциясы

- лактация кезеңі

- 8 жасқа дейінгі балалар (осы дәрілік түрі)

- эритромицинді «пируэт» типті қарыншалық тахикардияны (torsades de pointes) қоса алғанда, анамнезінде QT аралығының ұзаруы бар (QT аралығының туа біткен немесе анықталған жүре пайда болған ұзаруы) немесе жүректің қарыншалық аритмиясы бар пациенттерге тағайындауға болмайды

- эритромицинді QT аралығының ұзару қаупіне байланысты электролиттік теңгерімінің бұзылуы (гипокалиемия, гипомагниемия) бар пациенттерге тағайындауға болмайды

Қолдану кезіндегі қажетті сақтық шаралары

Эритромицин негізінен бауыр арқылы шығарылады, сондықтан бауыр функциясы бұзылған немесе бір мезгілде гепатоуытты дәрілік заттарды қабылдап жүрген пациенттерге антибиотиктерді сақтықпен тағайындау керек. Бауыр ферменттері белсенділігінің жоғарылауын және/немесе сарғаюмен немесе онсыз холестаздық гепатитті қоса алғанда, эритромицинді қабылдау кезінде бауыр функциясы бұзылуының туындауы туралы мәліметтер бар.

Барлық дерлік бактерияға қарсы дәрілерді, оның ішінде эритромицинді қолданғанда, Clostridium difficile туындатқан диарея (СДТД) байқалды, ол ауырлық дәрежесі бойынша орташа диареядан өлімге әкеп соғатын колитке дейін өзгеруі мүмкін. Антибиотиктерді қолданғаннан кейін диареямен ауыратын барлық пациенттерде СДТД ықтималдығын қарастыру керек. Сырқатнаманы мұқият анықтау қажет, себебі СДТД пайда болуы бактерияға қарсы препараттарды тағайындағаннан кейін екі айдан астам уақыт өткен соң орын алуы мүмкін.

Эритромицинді QT аралығының ұзаруын туындататын препараттармен бір мезгілде қабылдайтын пациенттер мұқият бақылауды қажет етеді.

Макролидтермен, оның ішінде эритромицинмен емдеу кезінде жүрек аритмиясы мен «пируэт» типті қарыншалық тахикардияның (torsades de pointes) даму қаупімен байланысты миокард реполяризациясының және QT аралығының ұзаруы байқалды. Өліммен аяқталған жағдайлар туралы хабарламалар бар.

Эритромицинді гидроксихлорохин немесе хлорохин қабылдайтын кез келген пациенттерге тағайындамас бұрын, жүрек-қантамыр оқиғалары мен жүрек-қантамыр ауруларынан болған өлім-жітімнің ықтимал жоғары қаупіне байланысты пайда мен қауіптің арақатынасын мұқият саралау керек.

Эритромицинді: жүректің ишемиялық ауруына, жүректің ауыр жеткіліксіздігіне, өткізгіштіктің бұзылулары немесе клиникалық маңызды брадикардияға шалдыққан пациенттерде; QT жоғарылауын туындатуы мүмкін, басқа дәрілік препараттарды бір мезгілде қабылдайтын пациенттерде; гипомагниемия сияқты электролиттік теңгерімнің бұзылулары бар пациенттерде сақтықпен пайдалану керек. Эритромицинді гипокалиемиямен ауыратын пациенттерде қолдануға болмайды.

Макролидтерді, соның ішінде эритромицинді қолдану салдарынан аритмия, миокард инфарктісі және жүрек-қантамыр ауруларынан болатын өлім-жітімнің сирек қысқа мерзімді қаупі анықталды. Бұл нәтижелерді қарастыру эритромицинді тағайындау кезінде емдеудің артықшылықтарымен теңестірілуі керек.

Дәрігерге немесе фармацевтке Сіз рецептісіз алынған кез келген дәрілерді қоса, қандай да бір басқа дәрілерді қабылдап жүргеніңізді, жақында қабылдағаныңызды немесе қабылдау мүмкін екеніңізді хабарлаңыз.

Егер Сіз қазіргі уақытта ломитапид (холестерин мен триглицеридтер сияқты қандағы майдың жоғары мөлшерін азайту үшін қолданылады) деп аталатын дәрі қабылдап жүрсеңіз, эритромицинді қабылдамаңыз. Бұл препаратты эритромицинмен бір мезгілде қабылдау бауыр жасушалары (трансаминазалар) өндіретін ферменттер деңгейінің жоғарылауына әкелуі мүмкін, бұл бауырдың жүктемеге ұшырағанын және бауыр проблемаларына әкелуі мүмкін екенін көрсетеді.

Эритромициннің басқа дәрілік заттарға әсері

Эритромицин CYP1A2 және CYP3A4 изоферменттерінің тежегіші болып табылады. Эритромицинмен бір мезгілде қолданғанда осындай тежелу CYP1A2 және/немесе CYP3A4 қатысуымен метаболизденетін препараттардың плазмадағы концентрациясының ұлғаюына және ұзаруына әкелуі мүмкін. Сондықтан эритромицинді CYP1A2 және/немесе CYP3A4 қатысуымен метаболизденетін препараттармен ем қабылдайтын пациенттерге сақтықпен қолдану керек. Мұның әсіресе емдік терезесі тар препараттарға қатысы бар. Қажет болса, дозаны түзету және қан плазмасындағы концентрацияны бақылау туралы мәселені қарастыру керек.

Эритромициннің әсеріне басқа препараттардың ықпалы

CYP3A4 изоферментін тежейтін дәрілік препараттар эритромицин метаболизмін тежеуі және қан плазмасындағы эритромицин концентрациясының жоғарылауына әкеп соғуы мүмкін.

CYP3A индукторлары болып табылатын препараттар (мысалы, рифампицин, фенитоин, карбамазепин, фенобарбитал, шілтер жапырақты шайқурай) эритромициннің метаболизмін туындатуы мүмкін, бұл эритромициннің субтерапиялық деңгейіне және оның әсерінің төмендеуіне әкелуі мүмкін. Эритромицинді CYP3A4 индукторларымен емдеу кезінде және одан кейін екі апта ішінде қолдануға болмайды, өйткені осы кезеңде индукцияның біртіндеп төмендеуі байқалады.

Эритромицинмен бір мезгілде қолданғанда Р450 цитохромы ферменттер жүйесімен метаболизденетін препараттардың қан сарысуындағы концентрациясының жоғарылауы байқалуы мүмкін: аценокумарол, альфентанил, астемизол, бромокриптин, карбамазепин, цилостазол, циклоспорин, дигоксин, дигидроэрготамин, дизопирамид, эрготамин, гексобарбитал, метилпреднизолон, мидазолам, омепразол, фенитоин, хинидин, рифабутин, силденафил, такролимус, терфенадин, домперидон, теофиллин, толтеродин, триазолам, вальпроат, винбластин және зеңге қарсы препараттар (мысалы, флуконазол, кетоконазол және итраконазол). Эритромицинді бір мезгілде қабылдайтын пациенттерде Р450 цитохромының қатысуымен метаболизденетін препараттардың қан сарысуындағы концентрациясын мұқият бақылау керек. Тиісті мониторинг жүргізіп және қажет болған жағдайда, дозаны түзету қажет.

ЭКГ-да QT аралығын ұзартатын дәрілік заттарға ерекше назар аудару керек.

Басқа дәрілік заттармен өзара әрекеттесуі

HMG-CoA-редуктаза тежегіштері

Эритромицин HMG-CoA-редуктаза тежегіштерінің (мысалы, ловастатин мен симвастатин) концентрациясын жоғарылататыны хабарланды. Рабдомиолизді қоса, миопатия қаупінің жоғарылауына байланысты эритромицинді HMG-CoA-редуктаза тежегіштерімен (статиндермен) бір мезгілде қолдануға болмайды. Осы препараттарды бір мезгілде қабылдаған пациенттерде рабдомиолиздің сирек жағдайлары байқалды.

Гистаминді H1-рецепторлардың блокаторлары

Эритромицин мен терфенадин, астемизол, домперидон және мизоластин сияқты Н1- антагонистерін бір мезгілде қабылдауды сақтықпен тағайындау керек, себебі эритромицин олардың метаболизмін өзгертеді.

Эритромицин бір мезгілде қабылдағанда терфенадиннің, астемизолдың және пимозидтің метаболизмін айтарлықтай өзгертеді. Сирек жағдайларда жүректің тоқтап қалуын, «пируэт» типті қарыншалық тахикардияны (torsades de pointes) және басқа да қарыншалық аритмияларды қоса алғанда, ауыр, ықтимал өлімге әкелетін жүрек-қантамыр бұзылыстары туралы хабарланды.

Гидроксихлорохин немесе хлорохинин (ревматоидты артритті қоса, ауруларды емдеу үшін немесе безгекті емдеу немесе профилактикасы үшін қолданылады).

Бұл дәрілерді эритромицинмен бір мезгілде қабылдау жүрек ырғағының бұзылу ықтималдығын және жүрекке әсер ететін басқа да күрделі жағымсыз әсерлерді арттыруы мүмкін.

Бактерияға қарсы дәрілер

In vitro жағдайында эритромицин мен бактерицидті бета-лактамды антибиотиктер (мысалы, пенициллин, цефалоспорин) арасында антагонизм бар. Эритромицин клиндамициннің, линкомициннің және хлорамфениколдың әсерін тежейді. Стрептомицинге, тетрациклиндерге және колистинге де қатысты.

Контрацептивтер

Кейбір антибиотиктер сирек жағдайларда ішектегі стероидты конъюгаттардың бактериялық гидролизіне және осылайша, байланыспаған стероидтардың реабсорбциясына кедергі жасау арқылы ұрықтануға қарсы препараттардың тиімділігін төмендетуі мүмкін. Нәтижесінде қан плазмасындағы белсенді стероидтың деңгейі төмендеуі мүмкін.

Протеаза тежегіштері

Эритромицин мен протеаза тежегіштерін бір мезгілде тағайындаған кезде эритромициннің ыдырауының тежелуі байқалды.

Пероральді антикоагулянттар

Эритромицин мен пероральді антикоагулянттарды (мысалы, варфарин, ривароксабан) қатар қабылдаған кезде антикоагуляциялық әсердің жоғарылауы туралы хабарламалар бар.

Бензодиазепиндер

Триазолбензодиазепиндер (мысалы, триазолам және апразолам) және онымен байланысты бензодиазепиндер. Эритромицин триазоламның, мидазоламның және онымен байланысты бензодиазепиндердің клиренсін төмендетеді және осылайша осы бензодиазепиндердің фармакологиялық әсерін арттыруы мүмкін.

Эрготамин

Маркетингтен кейінгі бақылаулар эритромицинді эрготаминмен немесе дигидроэрготаминмен үйлесімде қолдану орталық жүйке жүйесіндегі, аяқ-қолдағы және басқа тіндердегі тамырлардың спазмымен және ишемиясымен сипатталатын, қастауыштың жедел уыттылығымен байланысты екенін көрсетеді.

Цизаприд

Эритромицинмен бір мезгілде қолдану аясында пациенттерде цизаприд деңгейінің жоғарылауы туралы хабарланды. Бұл QT аралығының ұзаруына және аритмияның пайда болуына әкелуі мүмкін, соның ішінде қарыншалық тахикардия, қарыншалар фибрилляциясы және «пируэт» типті қарыншалық тахикардия (torsades de pointes). Ұқсас әсерлер пимозид пен кларитромицинді, басқа макролидті антибиотикті бір мезгілде қабылдаған пациенттерде байқалды.

Теофиллин

Эритромицинді жоғары дозада теофиллинді қабылдап жүрген пациенттерде қолдану қан сарысуындағы теофиллин концентрациясының жоғарылауына және теофиллиннің ықтимал уыттылығына әкеп соғуы мүмкін. Теофиллиннің уыттылық және/немесе сарысудағы теофиллин концентрациясының жоғарылау белгілері пайда болған жағдайда, эритромицинмен емдеу кезінде теофиллин дозасын азайту керек. Эритромицин мен теофиллинді бір мезгілде пероральді қолданғанда қан сарысуындағы эритромициннің концентрациясы айтарлықтай төмендейтінін болжауға мүмкіндік беретін хабарламалар жарияланды. Бұл эритромициннің субтерапиялық концентрациясына әкеп соғуы мүмкін.

Колхицин

Препарат нарыққа шыққаннан кейін колхициннің эритромицинмен бірге қолданылғандағы уыттылығы туралы хабарламалар келіп түсті.

Кальций өзекшелерінің блокаторлары

Кальций өзекшелерінің блокаторы верапамилді бір мезгілде қолданғанда артериялық гипотензия, брадиаритмия және лактоацидоз байқалды.

Циметидин

Циметидинді бір мезгілде қолдану эритромицин метаболизмін тежеуі мүмкін, бұл плазмадағы концентрацияның жоғарылауына әкелуі мүмкін.

Зопиклон

Эритромицин зопиклонның клиренсін төмендетіп, сол арқылы осы препараттың фармакодинамикалық әсерін күшейте алады.

Егер Сіз пероральді, инъекция немесе ингаляция (организмнің иммундық жүйесін бәсеңдету үшін қолданылады, бұл аурулардың кең ауқымын емдеу кезінде пайдалы) арқылы енгізілетін кортикостероидтар деп аталатын дәрілерді қабылдап жүрсеңіз, дәрігерге хабарлау маңызды.

Арнаулы ескертулер

Эритромицин резистенттіліктің таралуы ≥10% құрайтын өңірлерде инфекцияларды эмпирикалық емдеу үшін бірінші таңдау препараты болып табылмайды. Жекелеген пациентті эритромицинмен емдеудің орындылығы туралы шешімді қабылдаған кезде дұрыс қойылған диагноз, бекітілген көрсетілім бойынша инфекцияның бактериялық этиологиясы және эритромицинге немесе басқа макролидтерге резистенттіліктің таралуын айқындау жағдайында макролидті антибиотиктерді қолдану бойынша ұсынымдарды ескеру қажет.

Бактериялық респираторлық инфекцияларда, терінің және жұмсақ тіндердің асқынбаған инфекцияларында және ревматизмнің профилактикасы үшін эритромицинмен емдеуді бета-лактамды антибиотиктермен емдеу мүмкін болмаған жағдайда ғана тағайындау ұсынылады.

Макролидті антибиотиктер мен линкомициндер тобының антибиотиктері арасында айқаспалы резистенттілік пайда болуы мүмкін.

Басқа макролидтер сияқты, сирек кездесетін ауыр аллергиялық реакциялар, соның ішінде жедел жайылған экзантематозды пустулез байқалады. Аллергиялық реакция туындаған кезде, препаратты қабылдауды тоқтатып, тиісті ем тағайындау керек. Аллергиялық реакциялардың симптомдары симптоматикалық ем тоқтатылған кезде қайта туындауы мүмкін.

Эритромицин мен басқа макролидтер арасында айқаспалы аллергия пайда болуы мүмкін.

Эритромицин миастениямен ауыратын пациенттерде әлсіздік симптомдарын күшейтуі мүмкін деген хабарламалар бар.

Эритромицин несептегі катехоламиндердің флюорометриялық анықталуына кедергі келтіреді. Статиндермен бір мезгілде эритромицинді қабылдаған ауыр сырқаттанған пациенттерде бүйрек функциясының бұзылулары бар немесе онсыз рабдомиолиз (қаңқа бұлшықетінің жедел некрозы) туралы хабарланды.

Эритромицин туа біткен мерездің алдын алу үшін жеткілікті концентрацияда болжамды түрде шаранаға жетпейді деп хабарланды. Жүктілік кезінде мерезді ерте кезеңде емдеу үшін эритромицинді пероральді қабылдаған әйелдерден туылған сәбилерге пенициллинмен тиісті емдеуді тағайындау керек.

Сәбилерде эритромицинмен емдеуден кейін пайда болатын инфантильді гипертрофиялық пилорустық стеноздың (IHPS) дамуы туралы хабарланды. Эпидемиологиялық зерттеу деректері, соның ішінде мета-талдау деректері сәбилерде эритромициннің әсерінен кейін IHPS қаупінің 2-3 есе ұлғаюын болжауға мүмкіндік береді. Бұл қауіп өмірінің алғашқы 14 күнінде эритромициннің әсерінен кейін анағұрлым жоғары болады. Қолда бар деректер осы уақыт аралығында эритромицин әсер еткен соң қауіп 2,6 % (95% СА: 1,5–4,2 %) құрайтыны туралы куәландырады. Жалпы популяциядағы IHPS қаупі 0,1-0,2 %-ды құрайды. Бала емізу кезінде құсу туындағанда немесе мазасыздық пайда болған жағдайда ата-аналарға дәрігерге қаралу қажеттілігі туралы ескерту керек.

Педиатрияда қолданылуы

Препаратты 8 жасқа дейінгі балаларға қолдануға болмайды.

Жүктілік немесе лактация кезінде

Егер Сіз жүкті болсаңыз немесе бала емізетін болсаңыз, жүкті бола аламын деп ойласаңыз немесе бала тууды жоспарласаңыз, бұл дәріні қабылдамас бұрын дәрігеріңізбен немесе фармацевтпен кеңесіңіз.

Эритромициннің белсенді ингредиенті жүкті әйелдерде плацента арқылы өтуі мүмкін және емшек сүтімен шығарылады. Туа біткен ақаулардың қаупіне қатысты зерттеулерден алынған ақпарат қарама-қайшы, бірақ кейбір зерттеулерде жүктіліктің ертең кезеңінде эритромицинді қолданғаннан кейін жүрек ақаулары туралы хабарланды.

Эритромицинді әйелдерге жүктілік кезінде немесе емшек сүтімен емізу кезінде өте қажет болған жағдайда ғана қолдану керек.

Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Препарат көлік құралдарын және зейін қоюды және психомоторлық реакциялар жылдамдығын қажет ететін басқа да қауіптілігі зор қызмет түрлерімен айналысу қабілетіне ықпалын тигізбейді.

Қолдану бойынша ұсынымдар

Дозалау режимі

Ересектер мен 15 жастан асқан балалар

Ауырлығы жеңіл және орташа инфекциялық-қабыну ауруларын емдеу – күн сайын тәулігіне 2-4 қабылдауға тең бөлінген 2 г; ауыр инфекциялық-қабыну ауруларын емдеу – күн сайын 4 г дейін.

Ең жоғары тәуліктік доза – 4 г.

Балалар

Препарат 8 жасқа дейінгі балаларда қолдануға болмайды.

12-15 жас: 30-50 мг/кг, 1,5 г асырмай (3×500 мг)

8-12 жас: 30-50 мг/кг, 1,0 г асырмай (2×500 мг)

Егде жастағы пациенттер

Дозалау жөнінде арнайы нұсқаулар жоқ.

Бауыр және/немесе бүйрек функциясы бұзылған пациенттер

Бүйрек немесе бауыр функциясы бұзылған немесе басқа да қатарлас аурулары бар пациенттер үшін препаратпен емдеу кезінде мұқият бақылауды қамтамасыз ету қажет.

Ішке.

Сарысудағы эритромициннің оңтайлы концентрациясына таблеткаларды тамақ ішкенге дейін бір сағат бұрын қабылдау арқылы қол жеткізіледі.

Қабылдау уақыты көрсетілген қолдану жиілігі

Ауырлығы жеңіл және орташа инфекциялық-қабыну ауруларын емдеу – күн сайын тәулігіне 2-4 қабылдауға тең бөлінген 2 г; ауыр инфекциялық-қабыну ауруларын емдеу – күн сайын тәулігіне 2-4 қабылдауға тең бөлінген 4 г.

Емдеу курсының ұзақтығын ауру сипатына және емдеу тиімділігіне байланысты, оны дәрігер белгілейді.

Симптомдары: жүректің айнуы, диарея, асқазан аумағында жайсыздық, жеңіл түрдегі жедел панкреатит, бас айналу (әсіресе бауыр және бүйрек функциясының жеткіліксіздігі бар науқастарда), бауыр функциясы бұзылуының бауыр функциясының жедел жеткіліксіздігіне дейін бұзылуы, естуден айырылу.

Емі: белсенділенген көмір, тыныс алу жүйесінің жай-күйін мұқият бақылау. Орташа емдік дозадан бес есе асып кететін дозаны қабылдағанда асқазанды шаю тиімді. Гемодиализ, перитонеальді диализ, қарқынды диурез тиімсіз.

Дәрілік препараттың бір немесе бірнеше дозасын өткізу кезінде қажетті шаралар

Қатысты емес.

Тоқтату симптомы қатерінің болуын көрсету

Қатысты емес.

Дәрілік препаратты қолдану тәсілін түсіндіру үшін медициналық қызметкерге кеңес алу үшін жүгіну бойынша ұсынымдар

Препаратты дәрігердің тағайындауы бойынша қолданады.

ДП стандартты қолдану кезінде көрініс табатын жағымсыз реакциялардың сипаттамасы және осы жағдайда қабылдануы тиіс шаралар

Белгісіз (жекелеген жағдайлар) - қолда бар деректер негізінде жиілігін бағалау мүмкін емес

Жиі:

- жүрек айну, құсу, іш өту, анорексия

Кейде:

- бауыр ферменттері көрсеткіштерінің жоғарылауы

Сирек:

- тері бөртпелері, қышыну, есекжем, экзантема, ангиодистрофия

- холестаздық гепатит, сарғаю

Өте сирек:

- бауыр функциясының бұзылуы, гепатомегалия, бауыр функциясының жеткіліксіздігі, гепатоцеллюлярлы гепатит

- жалған жарғақшалы колит

- жаңа туған нәрестелерде гипертрофиялық пилорустық стеноз, панкреатит

- Стивенс-Джонсон синдромы, уытты эпидермальді некролиз, мультиформалы эритема

- анафилактоидтық реакциялар, анафилаксиялық шок

- интерстициальдік нефрит

- сананың шатасуы, құрысулар және бас айналу (препаратпен байланысы анықталған жоқ), елестеулер

Жекелеген жағдайлар:

- инфантильдік пилоростеноз

- жайылған жедел экзантематозды пустулез (ЖЖЭП)

- QT аралығының ұзаруы, пируэтті тахикардия, жүрек қағуының күшеюін сезіну және, қарыншалық тахиаритмияны қоса, жүрек ырғағының бұзылулары, гипотензия; жүректің тоқтауы, қарыншалық фибрилляция

- кереңдік, құлақтың щуылдауы (негізінен, бүйрек функциясының жеткіліксіздігі бар пациенттерде немесе көп дозаларды қабылдау аясында туындайтын, естудің қайтымды төмендеуі жөнінде мәлімдемелер бар)

- митохондриялық оптикалық нейропатия

- эозинофилия

- кеуденің ауыруы, қызба, дімкәстік

Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек

Қазақстан Республикасы Денсаулық сақтау министрлігі Медициналық және фармацевтикалық бақылау комитетінің «Дәрілік заттар мен медициналық бұйымдарды сараптау ұлттық орталығы» ШЖҚ РМК

http://www.ndda.kz

Қосымша мәліметтер

Бір таблетканың құрамында

белсенді зат – эритромицин (100 % затқа шаққанда), 250,00 мг;

қосымша заттар: желатин, кальций стеараты, полисорбат-80 (твин-80), лактоза моногидраты (сүтті қант), натрий карбоксиметилкрахмалы (примогель), А типі, картоп крахмалы;

қабықтың құрамы: метакрил қышқылы және этилакрилат сополимері (1:1) (колликут МАЕ 100Р), тальк, полисорбат-80 (твин-80), повидон К-30, титанның қостотығы Е171.

Ақ немесе сұрғылт реңді ақ түсті қабықпен қапталған, екі жақ беті дөңес, дөңгелек пішінді таблеткалар.

10 таблеткадан БП типті полимер банкаға салынады.

10 таблеткадан поливинилхлоридті үлбірден және лакталған баспалы алюминий фольгадан жасалған пішінді ұяшықты қаптамаға салынады.

Әрбір банка немесе 1 пішінді ұяшықты қаптама медициналық қолдану жөніндегі қазақ және орыс тілдеріндегі нұсқаулықпен бірге картон қорапшаға салынады.

2 жыл

Жарамдылық мерзімі өткеннен кейін қолдануға болмайды.

25 °С -ден аспайтын температурада сақтау керек.

Балалардың қолы жетпейтін жерде сақтау керек!

Рецепт арқылы

«Биосинтез» ЖАҚ, Ресей

440033, Пенза қ., Дружба к-сі, 4, тел./факс: (8412) 57-72-49,

e-mail: Biosintez.QA@sunpharma.com

«Биосинтез» ЖАҚ, Ресей

440033, Пенза қ., Дружба к-сі, 4, тел./факс: (8412) 57-72-49,

e-mail: Biosintez.QA@sunpharma.com

Қазақстан Республикасы аумағында тұтынушылардан дәрілік заттардың сапасына қатысты шағымдарды (ұсыныстарды) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, электронды пошта)

«Сан Фармасьютикал Индастриез Лимитед компаниясының» Қазақстан Республикасындағы өкілдігі

050008, Қазақстан Республикасы, Алматы қ., Манас к-сі, 32 «А», «SAT» Бизнес орталығы, 6 қабат, 602 кеңсе, тел. +7 (701) 991-19-56, 8-800-080-52-02, e-mail: Pharmacovigilance.kz@sunpharma.com