Декстанол раствор д/ин. 50 мг / 2 мл №6 (ампулы)

ДЕКСТАНОЛ

Декскетопрофен

вена ішіне және бұлшықет ішіне енгізуге арналған ерітінді, 50 мг/2 мл

Сүйек-бұлшықет жүйесі. Қабынуға қарсы және ревматизмге қарсы препараттар. Қабынуға қарсы және ревматизмге қарсы стероидты емес препараттар. Пропион қышқылының туындылары. Декскетопрофен.

АТХ коды M01AE17

- препаратты пероральді түрде қабылдау тиімсіз болған кезде орташа және айқын дәрежелі қарқындылықтағы жедел ауырсыну синдромында симптоматикалық емдеу, мысалы, операциядан кейінгі ауырсынуда, бүйрек шаншуы және арқаның төменгі бөлігінің (белдегі) ауырсынуында

Қолданудың басталуына дейін қажетті мәліметтер тізбесі

ДЕКСТАНОЛ препаратын келесі жағдайларда қолдануға болмайды:

- әсер етуші затқа, кез келген басқа ҚҚСП-ға немесе қосымша заттардың кез келгеніне жоғары сезімталдығы бар пациенттерге

- ұқсас әсер ететін заттары (мысалы, ацетилсалицил қышқылы және басқа ҚҚСП) демікпе, бронхоспазм, жедел ринит ұстамаларының дамуын қоздыратын немесе мұрын полиптерінің дамуын, есекжем немесе ангионевроздық ісінудің дамуын туындататын пациенттерге

- кетопрофенмен немесе фибраттармен емдеу кезінде фотоаллергиялық немесе фотоуыттылық реакциялардың белгілі дамуы бар пациенттерге

-анамнезінде алдыңғы ҚҚСП емімен байланысты асқазан-ішектен қан кету немесе ойық жараның тесілуі бар пациенттерге

-белсенді фазадағы пептикалық ойық жарасы / асқазан-ішектен қан кетуі бар немесе анамнезінде асқазан-ішектен қан кетуі, ойық жаралануы немесе тесілуі бар пациенттерге

- созылмалы диспепсиясы бар пациенттерге

- алкоголизммен ауыратын пациенттерге

- эпилепсиямен ауыратын пациенттерге

- белсенді фазадағы басқа қан кету немесе қан ұюы бұзылыстары кезінде

- Крон ауруы немесе ойық жаралы колит кезінде

- жүрек функциясының ауыр жеткіліксіздігінде

- бүйрек функциясының орташа немесе ауыр дәрежедегі бұзылыстарында (креатинин клиренсі ≤59 мл/мин)

-бауыр функциясының бұзылыстарында

- геморрагиялық диатез және қанның ұюының басқа да бұзылыстары кезінде

- айқын дегидратация кезінде (құсу, диарея немесе сұйықтықты жеткілікті қабылдамаған кезде);

- жүктілік және бала емізу кезеңінде

- балалар мен 18 жасқа дейінгі жасөспірімдер

Құрамында этанолдың болуына байланысты ДЕКСТАНОЛ препаратын нейроаксиалды (интратекальді немесе эпидуральді) енгізуге болмайды.

Анамнезінде аллергиялық жағдайы бар пациенттерге сақтықпен қабылдау керек.

ДЕКСТАНОЛ препаратын циклооксигеназа-2 селективті тежегіштерін қоса, басқа ҚҚСП-мен қолданудан аулақ болу керек.

Жағымсыз реакцияларын симптомдарды бақылау үшін қажетті ең қысқа уақыт ішінде ең төмен тиімді дозаны қолдану арқылы азайтуға болады.

Асқазан-ішек жолына қатысты қауіпсіздік

Өлімге әкелуі мүмкін асқазан-ішектен қан кету, ойық жаралану немесе тесілу барлық ҚҚСП-ны қабылдауда ем кезінде кез келген уақытта, алдын алу симптомдары бар немесе оларсыз немесе анамнезінде ауыр асқазан-ішек оқиғалары болған кезде тіркелген. ДЕКСТАНОЛ алатын пациенттерде асқазан-ішектен қан кету немесе ойық жара пайда болған кезде емдеуді тоқтату керек.

Асқазан-ішектен қан кету, ойық жара немесе тесілу қаупі анамнезінде ойық жарасы бар пациенттерде, әсіресе, егер ол қан кетумен немесе тесілумен асқынған болса, және егде жастағы адамдарда ҚҚСП дозалары ұлғайған кезде жоғары болады.

Егде жастағы адамдар: егде жастағы адамдарда ҚҚСП-ға жағымсыз реакциялардың, әсіресе өлімге әкелуі мүмкін асқазан-ішек қан кетулерінің және тесілудің жиілігі жоғары. Бұл пациенттер емді ең төмен қолжетімді дозадан бастауы тиіс.

Барлық ҚҚСП жағдайындағыдай, декскетопрофенмен емдеуді бастар алдында келесі аурулардың ремиссия кезеңінде екеніне көз жеткізу үшін анамнезінде эзофагиттің, гастриттің және / немесе ойық жара ауруының болуын анықтау қажет.

Асқазан-ішек симптомдары немесе анамнезінде асқазан-ішек жолы аурулары бар пациенттер ас қорыту тарапынан бұзылыстарына, әсіресе асқазан-ішектен қан кетулерге бақылауда болуы тиіс.

ҚҚСП-ны анамнезінде асқазан-ішек аурулары (ойық жаралы колит, Крон ауруы) бар пациенттерге сақтықпен тағайындау керек, өйткені осы аурулардың өршу қаупі бар.

Бұл пациенттерге протектор-препараттармен (мысалы, мизопростолмен немесе протон сорғысының тежегіштерімен), сондай-ақ төмен дозаларда ацетилсалицил қышқылымен немесе асқазан-ішек жолдары тарапынан бұзылыстардың пайда болу қаупін арттыруы мүмкін басқа препараттармен бір мезгілде емдеуді қажет ететін пациенттерге біріктірілген ем жүргізу мүмкіндігін қарастыру керек.

Анамнезінде асқазан-ішек аурулары бар пациенттер, әсіресе егде жастағы адамдар, әсіресе емдеудің бастапқы кезеңдерінде іш аумағының кез келген ерекше симптомдары (әсіресе асқазан-ішектен қан кету) туралы хабарлауы тиіс.

Пероральді кортикостероидтар, варфарин сияқты антикоагулянттар, серотонинді кері қармаудың селективті тежегіштері немесе ацетилсалицил қышқылы сияқты антиагреганттар сияқты ойық жара түзілуі немесе қан кету қаупін арттыратын қатар жүретін дәрілерді қабылдаған пациенттерге сақтықпен қарау керек.

Бүйрекке қатысты қауіпсіздік

Бүйрек функциясы бұзылған пациенттерге сақ болу керек. Бұл пациенттерде ҚҚСП қабылдау бүйрек функциясының нашарлауына, сұйықтықтың іркілуіне және ісінуге әкелуі мүмкін. Нефроуыттылық қаупінің жоғарылауына байланысты препаратты диуретиктермен емдеу кезінде, сондай-ақ гиповолемияның дамуы мүмкін пациенттерге сақтық таныту керек.

Емдеу кезінде сусызданудың алдын алу үшін және осыдан болуы мүмкін бүйректің уыттылығының жоғарылауына байланысты сұйықтықтың жеткілікті мөлшерде тұтынылуын қамтамасыз ету керек.

Барлық ҚҚСП сияқты, ол мочевина азотының және плазмадағы креатинин деңгейін жоғарылатуы мүмкін. Простагландиндер синтезінің басқа тежегіштері сияқты, оны қолдану бүйрек тарапынан гломерулонефритке, интерстициальды нефритке, папиллярлық некрозға, нефроздық синдромға және бүйрек функциясының жедел жеткіліксіздігіне әкелетін жағымсыз реакциялармен бірге жүруі мүмкін.

Егде жастағы пациенттер бүйрек функциясының бұзылуына көбірек бейім.

Бауырға қатысты қауіпсіздік

Бауыр функциясы бұзылған пациенттерге сақ болу керек.

Басқа ҚҚСП сияқты, декскетопрофен бауырдың кейбір көрсеткіштерінің уақытша және елеусіз ұлғаюына, сондай-ақ АСТ және АЛТ белсенділігін айтарлықтай өсуін туындатуы мүмкін. Көрсетілген көрсеткіштердің едәуір жоғарылауы кезінде терапияны тоқтату керек.

Егде жастағы пациенттер бауыр функциясының бұзылуына көбірек бейім.

Жүрек-қантамыр жүйесі мен ми қанайналымына қатысты қауіпсіздік

Артериялық гипертензиясы және / немесе ауырлығы жеңіл және орташа дәрежедегі жүрек жеткіліксіздігі бар пациенттерге тиісті мониторинг пен ұсынымдар қажет. Анамнезінде жүрек аурулары бар, атап айтқанда, жүрек функциясы жеткіліксіздігінің алдыңғы эпизодтары бар пациенттерді емдеу кезінде ерекше сақ болу керек – препаратты қолдану аясында жүрек функциясы жеткіліксіздігінің даму қаупі артады, өйткені ҚҚСП емдеу кезінде тіндерде сұйықтықтың іркілуі және ісінудің пайда болуы орын алды.

Клиникалық зерттеулер мен эпидемиологиялық деректер кейбір ҚҚСП (әсіресе жоғары дозаларда және ұзақ емдегенде) пайдалану артериялық тромбоздық оқиғалардың (мысалы, миокард инфарктісі немесе инсульт) шамалы жоғары қаупімен байланысты болуы мүмкін деп болжайды. Декскетопрофенді қолдану кезінде мұндай қауіпті болдырмау үшін деректер жеткіліксіз.

Демек, бақыланбайтын артериялық гипертензиясы, іркілісті жүрек жеткіліксіздігі, анықталған жүректің ишемиялық ауруы, шеткері артерия ауруы және / немесе цереброваскулярлық ауруы бар пациенттерді мұқият қараудан кейін ғана декскетопрофенмен емдеу керек. Дәл осындай бағалауды жүрек-қан тамырлары ауруларының (мысалы, гипертония, гиперлипидемия, қант диабеті, шылым шегу) қауіп факторлары бар пациенттерді неғұрлым ұзақ емдеуді бастар алдында жүргізу қажет.

Барлық селективті емес ҚҚСП тромбоциттер агрегациясын бәсеңдетуі және простагландиндер синтезін тежеу есебінен қан кету уақытын арттыруы мүмкін. Сондықтан варфарин немесе басқа кумариндер немесе гепариндер сияқты гемостазды бұзатын басқа ем қабылдаған пациенттерде декскетопрофенді пайдалану ұсынылмайды.

Егде жастағы пациенттер жүрек-тамыр жүйесі функциясының бұзылуына көбірек бейім.

Тері реакциялары

Терінің ауыр реакцияларының ҚҚСП қолданумен өзара байланысында, кейде өліммен аяқталатын, мысалы, эксфолиативтік дерматиттің, Стивенс-Джонсон синдромының және уытты эпидермалық некролиздің өте сирек жағдайлары сипатталған. Пациенттерде емдеудің басында осы реакциялардың пайда болу қаупі жоғары және көбінесе бұл реакциялар емдеудің бірінші айында болады. ДЕКСТАНОЛ препаратын қабылдауды тері бөртпесі, шырышты қабықтардың зақымдануы немесе аса жоғары сезімталдықтың кез келген басқа белгілері алғаш пайда болған кезде тоқтату керек.

Негізгі инфекция симптомдарының бүркемеленуі

Декскетопрофен инфекция симптомдарын бүркемелеуі мүмкін, бұл тиісті емнің басталуын кешіктіруге және сол арқылы инфекцияның нәтижесін нашарлатуға әкелуі мүмкін. Бұл ауруханадан тыс бактериялық пневмонияда және желшешектің бактериялық асқынуларында байқалды. ДЕКСТАНОЛ препаратын инфекцияға байланысты ауырсынуды жеңілдету үшін енгізгенде, инфекцияны бақылау ұсынылады. Ауруханамен байланысты емес жағдайларда, егер симптомдар сақталса немесе нашарласа, пациент дәрігерге қаралу керек.

Ерекше жағдайларда желшешек тері мен жұмсақ тіндердің күрделі инфекциялық асқынуларын тудыруы мүмкін. Бүгінгі күні бұл инфекциялардың өршуіндегі ҚҚСП рөлін жоққа шығаруға болмайды, сондықтан желшешек кезінде ДЕКСТАНОЛ препаратын қолданудан аулақ болу ұсынылады.

Қосымша ақпарат

Пациенттерге келесі жағдайларда ерекше сақ болу қажет:

-порфирин метаболизмінің тұқым қуалаған бұзылуымен (мысалы, жедел ауыспалы порфирия).

-сусызданумен

-тікелей ауқымды хирургиялық араласулардан кейін.

Егер дәрігер декскетопрофенмен ұзақ мерзімді ем қажет деп санаса, бауыр мен бүйректің функциясын, сондай-ақ қан талдауын үнемі тексеріп отыру керек.

Өте сирек жағдайларда аса жоғары сезімталдықтың ауыр реакциялары (мысалы, анафилаксиялық шок) байқалды. ДЕКСТАНОЛ препаратын қабылдағаннан кейін аса жоғары сезімталдықтың ауыр реакцияларының алғашқы белгілерінде емдеуді тоқтату қажет. Симптомдарға байланысты мұндай жағдайларда қажет кез келген емдеу дәрігердің (тиісті маманданған) бақылауымен жүргізілуі тиіс.

Созылмалы ринитпен, созылмалы синуситпен және / немесе мұрын полипозымен бірге демікпесі бар пациенттерде ацетилсалицил қышқылына және / немесе ҚҚСП аллергиясының тұрғындардың басқа бөлігіндегілерге қарағанда жоғары қаупі бар. Бұл дәрілік затты қабылдау, әсіресе ацетилсалицил қышқылы немесе ҚҚСП аллергиясы бар субъектілерде демікпе немесе бронх демікпесі ұстамаларын тудыруы мүмкін.

ДЕКСТАНОЛ препаратын гемопоэздік бұзылулардан, жүйелі қызыл жегі немесе дәнекер тіннің аралас ауруларынан зардап шегетін пациенттерге сақтықпен тағайындау керек.

ҚҚСП қолдану кезеңінде жұмсақ тіндерде оқшауланған инфекциялық үдерістердің белсенген жекелеген жағдайлары сипатталған. Осылайша, егер терапия кезінде бактериялық инфекцияның симптомдары пайда болса немесе нашарласа, пациенттерге дереу дәрігерге қаралу ұсынылады.

ДЕКСТАНОЛ препаратының бір ампуласында 200 мг этанол бар.

Бұл дәрі-дәрмектердегі этил спиртінің мөлшері басқа дәрілік заттардың әсеріне әсер етуі және өзгертуі мүмкін.

Бұл препараттың құрамында натрий мөлшері 1 ммольден (23 мг) кем, яғни «құрамында натрий жоқ» деп есептеуге болады.

Балалар мен жасөспірімдерде қолдану

ДЕКСТАНОЛ препаратын балалар мен жасөспірімдерде қолдану қауіпсіздігі расталмаған.

Төменде қабынуға қарсы стероидты емес препараттарға (ҚҚСП) тән өзара әрекеттесу түрлері сипатталған:

Жағымсыз біріктірілімдер:

• Басқа ҚҚСП (циклооксигеназа-2 селективті тежегіштерін қоса) және салицилаттардың жоғары дозалары (≥ 3 г / күн): бірнеше ҚҚСП бір мезгілде қабылдау синергиялық әсер есебінен асқазан-ішек ойық жаралары мен қан кету қаупін арттыруы мүмкін.

• Антикоагулянттар: ҚҚСП декскетопрофеннің плазма ақуыздарымен жоғары байланысуына және тромбоциттер функциясының тежелуіне және асқазан мен он екі елі ішектің шырышты қабығының зақымдалуына байланысты варфарин сияқты антикоагулянттардың әсерін күшейте алады. Егер бірге қолдану қажет болса, мұқият клиникалық бақылау және зертханалық көрсеткіштерге мониторинг жүргізу керек.

• Гепариндер: қан кету қаупінің жоғарылауы (тромбоциттер функциясының бәсеңдеуіне және гастродуоденальді аймақтың шырышты қабығының зақымдалуына байланысты). Егер бірге қолдану қажет болса, мұқият клиникалық бақылау және зертханалық көрсеткіштерге мониторинг жүргізу керек.

• Кортикостероидтар: асқазан-ішек ойық жаралары немесе қан кету қаупінің жоғарылауы.

• Литий (бірнеше ҚҚСП -мен сипатталған): ҚҚСП қандағы литий деңгейін жоғарылатады, ол улы мәндерге жетуі мүмкін (литийдің бүйрек экскрециясының төмендеуі). Сондықтан, бұл параметр декскетопрофенмен емдеуді бастау, түзету және емді тоқтату кезінде мониторингтеуді қажет етеді.

• Аптасына 15 мг және одан да көп жоғары дозаларда қолданылатын метотрексат: негізі қабынуға қарсы дәрілердің әсерінен оның бүйрек клиренсін төмендету есебінен метотрексаттың гематологиялық уыттылығын арттыру.

• Гидантоиндер мен сульфаниламидтер: бұл заттардың уытты әсері артуы мүмкін.

Сақтықты қажет ететін біріктірілімдер:

• Диуретиктер, АӨФ тежегіштері, бактерияға қарсы аминогликозидтер және ангиотензин II рецепторларының антагонистері: декскетопрофен диуретиктер мен гипотензивті препараттардың әсерін төмендетуі мүмкін. Бүйрек функциясы бұзылған кейбір пациенттерде (мысалы, сусызданған пациенттер немесе бүйрек функциясы бұзылған егде пациенттер) циклооксигеназды тежейтін агенттерді және АӨФ тежегіштерін, ангиотензин II рецепторларының антагонистерін немесе бактерияға қарсы аминогликозидтерді бірлесіп енгізу бүйрек функциясының одан әрі нашарлауына алып келуі мүмкін, бұл әдетте қайтымды. Декскетопрофен мен диуретикті біріктіріп тағайындаған жағдайда пациенттің жеткілікті ылғалдану деңгейі бар екеніне көз жеткізу және емнің басында бүйрек функциясын бақылау маңызды.

• Төмен дозаларда қолданылатын метотрексат аптасына 15 мг-ден аз: метотрексаттың гематологиялық уыттылығы оның бүйрек клиренсін жалпы қабынуға қарсы препараттармен төмендету есебінен жоғарылайды. Біріктірілімді қабылдаудың алғашқы апталары ішінде қан талдауын апта сайын мониторингтеу. Бүйрек функциясының шамалы бұзылуы болған кезде, сондай-ақ егде жастағы адамдарда бақылауды күшейту.

• Пентоксифиллин: қан кету қаупі артады. Бақылауды күшейту және қан кету уақыты сияқты көрсеткішті жиі тексеру қажет.

• Зидовудин: ретикулоциттерге әсер етуінен эритроциттердің уыттылығының жоғарылау қаупі, бұл ретте ҚҚСП қабылдау басталғаннан кейін бір аптадан соң ауыр анемия пайда болады. ҚҚСП қолдану басталғаннан кейін бір-екі апта ішінде қанның жалпы талдауын жасап, ретикулоциттердің санын тексеру керек.

• Сульфонилмочевина: ҚҚСП плазма ақуыздарымен байланысатын сайттарды ауыстыру арқылы сульфонилмочевинаның гипогликемиялық әсерін күшейте алады.

Ескеру қажет біріктірілімдер:

• Бета-адреноблокаторлар: ҚҚСП емдеу простагландиндер синтезін тежеу есебінен олардың гипертензияға қарсы әсерін төмендетуі мүмкін.

• Циклоспорин және такролимус: нефроуыттылық бүйрекке простагландиндердің жанама әсерлері есебінен ҚҚСП-мен күшеюі мүмкін. Біріктірілген ем кезінде бүйрек функциясын өлшеу керек.

• Тромболитиктер: қан кету қаупінің жоғарылауы.

• Антиагреганттар және серотонинді кері қармаудың селективті тежегіштері (СКҚСТ): асқазан-ішектен қан кету қаупінің жоғарылауы.

• Пробенецид: плазмадағы декскетопрофен концентрациясы жоғарылауы мүмкін; бұл өзара әрекеттесу бүйрек өзекшелері мен глюкуроноконъюгация секрециясын бәсеңдету механизмімен байланысты болуы мүмкін және декскетопрофен дозасын түзетуді қажет етеді.

• Жүрек гликозидтері: ҚҚСП плазмадағы гликозидтердің концентрациясын жоғарылатуы мүмкін.

• Мифепристон: теория бойынша, простагландин синтетаза тежегіштері мифепристонның тиімділігіне әсер етуі мүмкін. Шектеулі деректер простагландинді енгізген күні ҚҚСП бірге қолдану мифепристон немесе простагландиннің жатыр мойнының жетілуіне немесе жатырдың жиырылуына әсеріне теріс әсер етпейтінін және медициналық көрсетілімдер бойынша жүктілікті үзудің клиникалық тиімділігін төмендетпейтінін көрсетеді.

• Хинолонды антибиотиктер: жануарлардан алынған мәліметтер хинолондардың жоғары дозалары ҚҚСП -мен бірге құрысулар қаупін арттыруы мүмкін екенін көрсетеді.

• Тенофовир: ҚҚСП-мен бір мезгілде қабылдау мочевина азотын және плазмадағы креатининді арттыруы мүмкін, бүйрек функциясына ықтимал синергиялық әсерін тексеру үшін бүйрек функциясын бақылау керек.

• Деферазирокс: ҚҚСП-мен бір мезгілде қабылдау асқазан-ішек уыттылығы қаупін арттыруы мүмкін. Деферазирокс осы заттармен үйлескен кезде мұқият клиникалық мониторинг қажет.

• Пеметрексед: ҚҚСП-мен бір мезгілде қабылдау пеметрекседтің шығарылуын төмендетуі мүмкін, сондықтан ҚҚСП-ның неғұрлым жоғары дозаларын тағайындау кезінде сақ болу керек. Жеңіл және ауырлығы орташа дәрежедегі бүйрек жеткіліксіздігі бар пациенттерде (креатинин клиренсі 45-тен 79 мл / мин дейін) пеметрекседті қабылдағаннан кейін 2 күн және қабылдау алдында 2 күн бойы ҚҚСП дозаларымен пеметрекседті бір мезгілде қабылдаудан аулақ болу керек.

Жүктілік

Жүктіліктің соңғы үш айында ДЕКСТАНОЛ препаратын қабылдамаңыз, себебі бұл сіздің туылмаған балаңызға зиян тигізуі немесе босану кезінде қиындықтар тудыруы мүмкін. Бұл сіздің туылмаған балаңызда бүйрек және жүрек ауруларын тудыруы мүмкін. Сіздің және сіздің балаңыздың қан кету бейімділігіне әсер етуі мүмкін және мерзімінен асқан жүктілікке (кешігіп босану) немесе ұзаққа созылған босануға себеп болуы мүмкін.

Жүктіліктің алғашқы 6 айында ДЕКСТАНОЛ препаратын шұғыл қажеттілік болған жағдайда және дәрігердің тағайындауымен ғана қабылдау қажет. Егер сізге осы уақыт аралығында ДЕКСТАНОЛ қабылдау қажет болса немесе жүкті болуды жоспарласаңыз, ең аз дозаны ең қысқа мерзімде қолдану керек. Жүктіліктің 20-шы аптасынан бастап ДЕКСТАНОЛ препаратын бірнеше күннен артық қолдану сіздің туылмаған балаңызда бүйрек ауруларын тудыруы мүмкін, бұл ұрықты қоршаған амниотикалық сұйықтықтың азаюына әкелуі мүмкін (қағанақ суының аздығы). Егер сізге бірнеше күннен артық емдеу қажет болса, дәрігер қосымша бақылауды ұсынуы мүмкін.

Лактация

Емшекпен емізу кезінде ДЕКСТАНОЛ препаратын қабылдауға болмайды.

Препараттың көлік құралын немесе ықтимал қауіпті механизмдерді басқару қабілетіне әсер ету ерекшеліктері

ДЕКСТАНОЛ бас айналу, көру қабілетінің бұзылуы немесе ұйқышылдық сияқты жағымсыз әсерлерді тудыруы мүмкін. Мұндай жағдайларда тез жауап беру қабілеті, жол жағдайларында бағдарлау және механизмдерді басқару қабілеті нашарлауы мүмкін.

Дозалау режимі

Вена ішіне және бұлшықет ішіне енгізу үшін.

Ересектер: ДЕКСТАНОЛ (2 мл) бір ампуласының ішіндегісін баяу инъекция жолымен әр 8-12 сағат сайын бұлшықетке терең енгізеді. Қажет болса, препаратты қабылдау әр 6 сағат сайын жүргізілуі мүмкін. Ең жоғары тәуліктік доза 150 мг аспауы тиіс. ДЕКСТАНОЛ қысқа мерзімді емдеуге тағайындалады және тек жедел симптоматикалық кезеңмен (екі күннен аспайтын) шектеледі. Пациенттер мүмкіндігінше пероральді анальгетиктерге көшуі тиіс.

Жағымсыз реакцияларын ауру симптомдарының қарқындылығын төмендету үшін қажетті ең аз уақыт ішінде ең аз тиімді дозаны пайдалану есебінен қысқартуға болады.

Операциядан кейінгі орташа және айқын қарқындылықтағы ауырсыну кезінде ДЕКСТАНОЛ препаратын ересектерде көрсетілімі бойынша апиынды анальгетиктермен үйлесімде ұсынылған дозаларда қолдануға болады.

Егде жастағы пациенттер

Егде жастағы пациенттер үшін дозаны түзету әдетте қажет емес. Алайда бүйрек функциясының физиологиялық төмендеуімен байланысты, препараттың өте төмен дозасы ұсынылады: егде жастағы пациенттерде бүйрек функциясының жеңіл бұзылуларында жалпы тәуліктік доза 50 мг құрайды.

Бауыр жеткіліксіздігі бар пациенттер

Бауырдың ауырлығы жеңілден орташа дәрежеге дейінгі (Чайлд-Пью шкаласы бойынша 5–9 балл) патологиясы бар науқастар үшін ең жоғары тәуліктік дозаны 50 мг-ге дейін қысқартқан және бауыр функциясын мұқият қадағалаған жөн. Декстанолды бауырдың ауыр дисфункциясы бар (Чайлд-Пью шкаласы бойынша 10–15 балл) пациенттерге қолдануға болмайды.

Бүйрек жеткіліксіздігі бар пациенттер

Бүйрек функциясы жеңіл дәрежеде бұзылған (креатинин клиренсі 60–89 мл/мин) науқастар үшін тәуліктік жиынтық дозаны 50 мг-ге дейін қысқартқан жөн. ДЕКСТАНОЛ бүйрек функциясының орташа және ауыр дәрежедегі жеткіліксіздігі бар (креатинин клиренсі ≤ 59 мл/мин) пациенттерге қолдануға болмайды.

Балалар

ДЕКСТАНОЛ препаратының балалар мен жасөспірімдерге әсері зерттелмеген. Сондықтан балалар мен жасөспірімдердегі қауіпсіздігі мен тиімділігі анықталмаған және осы жас тобына препаратты қолдану ұсынылмайды.

ДЕКСТАНОЛ препаратын бұлшықет ішіне немесе вена ішіне қолданады:

- Бұлшықет ішіне қолдану: ДЕКСТАНОЛ препаратының бір ампуласының (2 мл) ішіндегісін бұлшықетке баяу терең енгізеді.

- Вена ішіне қолдану:

Вена ішіне инфузия: «Пайдалану және қолдану жөніндегі нұсқаулық» бөліміндегі сипаттамаға сәйкес дайындалған дайын ерітіндіні вена ішіне баяу 10-30 минут бойы енгізеді. Ерітіндіні табиғи күндізгі жарықтың әсеріне ұшыратуға болмайды.

Вена ішіне инъекция (болюсті енгізу): қажет болған жағдайда ДЕКСТАНОЛ препаратының бір ампуласының (2 мл) ішіндегісін вена ішіне кемінде 15 секунд енгізеді.

Препаратты қолдану жөніндегі нұсқаулар

ДЕКСТАНОЛ препаратын болюстік енгізу түрінде бұлшықет ішіне немесе вена ішіне енгізу кезінде ерітіндіні ампуладан жинап, бірден енгізу керек.

Вена ішіне инфузия үшін ерітіндіні табиғи күндізгі жарықтың әсеріне жол бермей, асептикалық жағдайларда сұйылту керек. Дәрілік препаратты енгізер алдында сұйылту жөніндегі нұсқаулық төменде көрсетілген:

Пайдалану және қолдану жөніндегі нұсқаулық

Инъекцияға арналған ерітіндіні аздаған мөлшерлерде (мысалы, шприцте) гепаринмен, лидокаинмен, морфинмен, және теофиллинмен араластыруға болады.

Вена ішіне инфузия түрінде қолдану үшін бір ампуланың (2 мл) ішіндегіні 30–100 мл физиологиялық ерітіндіде, глюкоза ерітіндісінде немесе Рингер-лактат ерітіндісінде сұйылтады. Инфузияны күндізгі табиғи жарықтың әсеріне жол бермей, асептикалық жағдайда әзірлейді. Дайындалған ерітінді мөлдір болуға тиіс.

100 мл физиологиялық ерітіндіде немесе глюкоза ерітіндісінде сұйылтылған, инъекцияға арналған ерітіндіні дофаминмен, гепаринмен, гидроксизинмен, лидокаинмен, морфинмен, петидинмен және теофиллинмен араластыруға болады.

Препараттың сұйылтылған ерітіндісін полиэтилен пакеттерде немесе этилвинилацетаттан (ЭВА), целлюлоза пропионатынан (ЦП), тығыздығы төмен полиэтиленнен (ТТПЭ) және поливинилхлоридтен (ПВХ) енгізуге арналған құрылғыларда сақтағанда әсер етуші заттар мөлшерінің адсорбция салдарынан өзгергені байқалған жоқ.

ДЕКСТАНОЛ бір реттік қолдануға арналған, кез келген пайдаланылмаған ерітіндіні утилизациялау керек. Енгізер алдында ерітіндінің мөлдір және түссіз екеніне көз жеткізу керек; қатты бөлшектері бар ерітіндіні қолдануға болмайды.

Үйлесімсіздігі

ДЕКСТАНОЛ препаратын дофамин, прометазин, пентазоцин, петидин және гидроксизин ерітінділерімен (мысалы, шприцте) аз мөлшерде араластыруға болмайды, өйткені араластыру нәтижесінде ерітіндіде шөгінді түзіледі.

Қолдану жөніндегі нұсқауларға сәйкес дайындалған, инфузияға арналған ерітінділерді прометазинмен және пентазоцинмен араластыруға болмайды.

Артық дозалану симптомдары белгісіз. Осыған ұқсас дәрілік заттар асқазан-ішек жолының (құсу, анорексия, іштің ауыруы) және жүйке жүйесінің тарапынан (ұйқышылдық, бас айналу, дезориентация, бас ауыруы) бұзылулар тудырады.

Кездейсоқ қабылдаған немесе артық дозаланған кезде пациенттің клиникалық жағдайына сәйкес симптоматикалық емді дереу бастау керек.

Декскетопрофен трометамол организмнен диализдің көмегімен шығарылады.

Егер Сізде осы препаратты қолдану туралы қосымша сұрақтарыңыз болса, дәрігермен кеңесіңіз.

Жиі:

- жүрек айнуы, құсу

- инъекция орнында ауырсыну, инъекция орнындағы реакция, оның ішінде қабыну, гематома, қан кету

Жиі емес:

- анемия

- ұйқысыздық

- бас ауыруы, бас айналу, ұйқышылдық

- көрудің бұлыңғырлануы

- гипотензия, қызу сезімі

- іштің ауыруы, диспепсия, диарея, іш қату, гематемезис, ауыздың құрғауы

- дерматит, қышу, бөртпе, гипергидроз

- қызба, шаршау, ауырсыну, қалтырау

Сирек:

- көмейдің ісінуі

- гипергликемия, гипогликемия, гипертриглицеридемия, анорексия

- парестезия, естен тану

- құлақтың шыңылдауы

- экстрасистолия, тахикардия

- гипертензия, беткейлік тромбофлебит

- брадипноэ

- ойық жара ауруы, қан кету немесе тесілу

- бауыр жасушаларының зақымдануы

- есекжем, акне

- сүйек-бұлшықет сіресуі, буындардың сіресуі, бұлшықет құрысуы, арқадағы ауырсыну

- бүйрек функциясының жедел жеткіліксіздігі, полиурия, бүйрек шаншуы, кетонурия, протеинурия

- етеккір циклінің бұзылуы, қуықасты безі функциясының бұзылуы

- діріл, шеткері ісіну

- бауыр функциясының биохимиялық көрсеткіштеріндегі ауытқулар

Өте сирек:

- нейтропения, тромбоцитопения

- анафилаксиялық реакциялар, оның ішінде анафилаксиялық шок

- бронхоспазм, ентігу

- панкреатит

- Стивенс-Джонсон синдромы, уытты эпидермалық некролиз( Лайелл синдромы), ангионевроздық ісіну, беттің ісінуі, фотосезімталдық реакциясы

- нефрит немесе нефроздық синдром

Жоғарыда аталған симптомдар пайда болған жағдайда препаратты қабылдауды тоқтатып, дереу медициналық көмекке жүгініңіз.

Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек

Қазақстан Республикасы Денсаулық сақтау министрлігі Медициналық және фармацевтикалық бақылау комитетінің «Дәрілік заттар мен медициналық бұйымдарды сараптау ұлттық орталығы» ШЖҚ РМК

http://www.ndda.kz

Қосымша мәліметтер

Бір ампуланың құрамында

белсенді зат – 73.80 мг декскетопрофен трометамолы (50 мг декскетопрофенге баламалы),

қосымша заттар: этанол 96 %, натрий хлориді, натрий гидроксиді, инъекцияға арналған су.

Мөлдір, түссіз ерітінді

2 мл препараттан I типті күңгірт шыныдан жасалған, сындыруға арналған сызығы бар ампулаға құяды. Ампулаға тез қататын бояумен терең басу әдісімен мәтін жазылады.

6 ампуладан поливинилхлоридті үлбірден жасалған пішінді ұяшықты қаптамада медициналық қолдану жөніндегі қазақ және орыс тілдеріндегі нұсқаулықпен бірге картон қорапшаға салынады.

2 жыл

Жарамдылық мерзімі өткеннен кейін қолдануға болмайды.

Құрғақ жерде, 25°С-ден аспайтын температурада, жарықтың әсерінен қорғау үшін түпнұсқалық қаптамасында сақтау керек.

Балалардың қолы жетпейтін жерде сақтау керек!

Рецепт арқылы

Идол Илач Долум Санаи ве Тиджарет А.Ш., Түркия

Davutpaşa Cad. Cebealibey Sok. No: 20 Topkapı - Zeytinburnu, Стамбул қ.

Тел: +90 (380) 526 30 60

Факс: +90 (380) 526 30 43

Электрондық пошта: nobel@nobel.com.tr

«Нобел Алматы Фармацевтикалық Фабрикасы» АҚ

Қазақстан Республикасы, Алматы қ., Шевченко көш., 162 Е.

Телефон нөмірі: +7 (727) 399-50-50

Электрондық пошта: nobel@nobel.kz

«Нобел Алматы Фармацевтикалық Фабрикасы» АҚ

Қазақстан Республикасы, Алматы қ., Шевченко көш., 162 Е.

Телефон нөмірі: +7 (727) 399-50-50

Электрондық пошта: nobel@nobel.kz