Цефазолин

ЦЕФАЗОЛИН-АКОС

Цефазолин

Вена ішіне және бұлшықет ішіне енгізу үшін ерітінді дайындауға арналған ұнтақ, 1 г

Жүйелі қолдануға арналған инфекцияға қарсы препараттар. Жүйелі қолдануға арналған бактерияға қарсы препараттар. Бактерияға қарсы бета-лактамды басқа препараттар. Бірінші буын цефалоспориндері. Цефазолин.

ATХ коды: J01DВ04

Препаратқа сезімтал микроорганизмдерден туындаған инфекциялар:

- жедел және созылмалы бронхит, инфекция жұқтырылған бронхоэктаза, бактериялық пневмония және бронхопневмония, эмпиема және өкпе абсцесі;

- жедел және созылмалы пиелонефрит, цистит, уретрит, простатит;

- мастит, тілмелі қабыну, карбункул, инфекция жұқтырылған гангрена, флегмона, жарақаттық, күйік және операциядан кейінгі инфекциялар;

- остеомиелит, сепсистік артрит;

- эндокардит;

- сепсис;

- перитонит;

- ортаңғы отит;

- мерез, соз;

- операция алдындағы және операциядан кейінгі кезеңдегі хирургиялық инфекциялар профилактикасы.

Қолдануды бастағанға дейін қажетті мәліметтер тізбесі

- цефалоспориндер тобының препараттарына және басқа беталактамды антибиотиктерге аса жоғары сезімталдық;

- жүктілік және лактация кезеңі;

- жаңа туған нәрестелер (1 айға дейін);

- жүрек блокадасы.

Сақтықпен: бүйрек және/немесе бауыр жеткіліксіздігі; ішек аурулары (оның ішінде анамнездегі колит); балалар жасы (1 жасқа дейін); бронх демікпесі бар пациенттер, анамнезінде бөртулер немесе есекжем көріністері болғанда; тамақтанудың жеткіліксіздігі немесе бұзылуы жағдайларында, парентеральді тамақтану жүргізілгенде немесе күшін айқын жоғалтқан пациенттерге (бұл пациенттер К дәрумені тапшылығымен зардап шегуі мүмкін, оларға мұқият мониторинг жүргізу қажет).

Егде жастағы пациенттерге сақтықпен пайдаланып, дозаларға және дозаларды енгізу арасындағы аралықтарға айрықша көңіл аудару керек. Физиологиялық функциялары төмендеуіне байланысты егде пациенттерде  К дәрумені тапшылығы туындататын әлеуетті қан кету сияқты жағымсыз құбылыстардың пайда болуы ықтимал.

Антибиотиктер

Цефазолинді бактериостатикалық әсері бар антибиотиктермен (мысалы, тетрациклиндермен, сульфаниламидтермен, эритромицинмен, хлорамфениколмен) бір мезгілде тағайындауға болмайды, өйткені in vitro антагонистік әсерлері байқалды.

Антикоагулянттар

Цефалоспориндер сирек жағдайларда коагуляцияның бұзылыстарына және қан кетуіне әкелуі мүмкін. Сондықтан антикоагулянттар (мысалы, варфарин немесе гепарин) енгізілген кезде коагуляция көрсеткіштерін бақылау керек.

К дәрумені

Цефамандол, цефазолин және цефотетан сияқты кейбір цефалоспориндер К1 дәруменінің алмасуын, әсіресе К1 дәруменінің тапшылығы жағдайында бұзады. Бұл К1 дәруменімен орын басу терапиясын қажет етуі мүмкін.

Пробенецид

Пробенецидті бір мезгілде қабылдаған кезде цефазолиннің бүйректік клиренсі төмендейді.

Нефроуытты препараттар

Антибиотиктердің (мысалы, аминогликозидтер, колистин, полимиксин В) және диуретиктердің (мысалы, фуросемид) нефроуытты әсерін жоққа шығаруға болмайды.

Цефазолинмен бірге қолданған жағдайда бүйрек көрсеткіштерін мұқият бақылау қажет.

Аса жоғары сезімталдық реакциялары

Басқа бета-лактамды бактерияға қарсы дәрілер жағдайындағыдай, Цефазолинге ауыр және кенеттен өлімге әкелетін аса жоғары сезімталдық реакциялары туралы хабарламалар бар. Аса жоғары сезімталдықтың ауыр реакциялары дамыған жағдайда Цефазолинмен емдеуді дереу тоқтату және талапқа сай емдік іс-шараларды жүргізуді бастау керек. Емдеуді бастар алдында пациентте анамнезінде Цефазолинге, басқа цефалоспориндерге немесе басқа бета-лактамдарға ауыр аса жоғары сезімталдық реакциялары бар-жоғын анықтау керек. Анамнезінде басқа да бета-лактамды препараттарға ауыр емес аса жоғары сезімталдық реакциялары бар пациенттерге цефазолинді сақтықпен қолдану керек.

Анамнезінде басқа бета-лактамды препараттарға ауыр емес аса жоғары сезімталдық реакциялары бар пациенттерге Цефазолинді сақтықпен қолданған жөн.

Анамнезінде аллергиялық реакциялардың (бронх демікпесі, аллергиялық ринит) кез келген түрі болған пациенттерде Цефазолинді қолданған кезде сақ болу қажет.

Бактерияға қарсы препараттармен емдеу, әсіресе егде жастағы адамдарда ауыр ауруларда, сондай-ақ әлсіз пациенттерде, балаларда антибиотикпен астасқан диареяның, колиттердің, оның ішінде жалған жарғақшалы колиттің пайда болуына әкелуі мүмкін. Сондықтан, Цефазолинмен емдеу кезінде немесе одан кейін диарея туындаған кезде осы диагноздарды, оның ішінде жалған жарғақшалы колитті жоққа шығару керек. Цефазолин қолдануды ауыр және/немесе қан аралас іш өту жағдайында тоқтату және тиісті ем жүргізу қажет.

Цефазолинді ұзақ қолдану микроорганизмдердің сезімталсыздығының (резистенттілік) дамуына әкелуі мүмкін. Пациентті мұқият клиникалық бақылау өте қажет.

Бүйрек функциясы бұзылған пациенттерде жоғары дозаларды мақсатқа сай емес тағайындағанда құрысу туындауы мүмкін.

Бүйрек функциясы төмендеген науқастарда бүйректің функционалдық зақымдануының ауырлығына байланысты Цефазолин енгізулері арасындағы дозалар мен аралықтарды дұрыс таңдау қажет. Бүйрек тұрақсыз жұмыс істеген жағдайда қан сарысуындағы Цефазолин деңгейін тұрақты бақылау препаратты қолдану қауіпсіздігін қамтамасыз етуге мүмкіндік береді.

Цефалоспориндер протромбин белсенділігінің төмендеуін тудыруы мүмкін. Қауіп тобына бүйрек немесе бауыр жеткіліксіздігі бар немесе алиментарлық статусы нашар пациенттер, сондай-ақ бактерияға қарсы емнің ұзақ курсынан өткен пациенттер және бұрын антикоагулянттық емге тұрақтанған пациенттер кіреді. Қауіп тобындағы пациенттерде протромбин уақытын немесе ХҚҚ бақылау қажет. Қажет болса, К дәруменін енгізу керек (аптасына 10 мг).

Егер олар Бенедикт ерітіндісін, Фелинг ерітіндісін немесе Клинитест таблеткаларын пайдалана отырып жүргізілсе, несептегі қант құрамына зертханалық талдаулардың жалған оң нәтижелері байқалуы мүмкін. Сонымен қатар, Цефазолин ферменттік әдістер арқылы өндірілген несептегі қанттың мөлшеріне талдау нәтижелеріне әсер етпейді. Одан өзге, Кумбстың тікелей және тікелей емес тестінің жалған оң нәтижелері байқалуы мүмкін, мысалы, анаcы Цефазолинмен емделген нәрестелерде.

Цефазолиннің 1000 мг бір құтысында 2,1 ммоль/л (немесе 48 мг) натрий бар. Бұл деректерді құрамында аз мөлшерде натрий бар диетадағы пациенттер үшін назарға алу қажет.

Педиатрияда қолдану

Шала туған нәрестелерде және жаңа туған нәрестелерде пайдалану қауіпсіздігі анықталмағанына байланысты, осы пациенттерге препаратты қолдану ұсынылмайды.

Жүктілік немесе лактация кезінде

Жүктілік кезінде және лактация кезеңінде қолдануға болмайды.

Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Цефазолин-АКОС препаратын қолданғанда мыналар туындауы мүмкін: бас айналуы, құрысу, жүрек айнуы, құсу, іштің ауыруы, осыған байланысты емдеу кезінде көлік құралын немесе ықтимал қауіпті механизмдерді басқарудан бас тарту керек.

Дозалау режимі

Дозасы, енгізу әдісі және дозалау аралығы инфекцияның ауырлығына, анықталған қоздырғыштардың сезімталдығына және пациенттің жағдайына (мысалы, бүйрек функциясы) байланысты.

Бүйрек функциясы бұзылмаған ересектер мен 12 жастан асқан жасөспірімдер

Жоғары сезімтал қоздырғыштардан туындаған инфекциялар

Ересектерге арналған әдеттегі доза күніне 1 г-нан 2 г-ға дейінді құрайды, жиілігі – екі немесе үш теңдей доза (әр 8-12 сағат сайын бір дозадан).

Сезімталдығы азырақ қоздырғыштардан туындаған инфекциялар

Әдеттегі доза күніне 3-тен 4 г-ға дейінді құрайды, жиілігі – үш немесе төрт теңдей доза (әр 6-8 сағат сайын бір дозадан).

Ауыр және өмірге қауіп төндіретін инфекциялар кезінде

Дозасы күніне 6-дан 12 г-ға дейін, жиілігі үш немесе төрт теңдей дозаны құрайды (әр 6-8 сағат сайын бір дозадан).

Операция алдындағы профилактика үшін ересектер мен жасөспірімдерге келесі дозалар ұсынылады:

А) операция басталғанға дейін 30-60 минут бұрын вена ішіне немесе бұлшықет ішіне 1 г;

Б) ұзақтау операциялық араласулар үшін (мысалы, 2 сағат немесе одан да көп) операция кезінде вена ішіне немесе бұлшықет ішіне 0,5-тен 1 г-ға дейін (енгізу операцияның ұзақтығына байланысты өзгереді);

В) операциядан кейін 24 сағат ішінде 6-8 сағат сайын вена ішіне немесе бұлшықет ішіне 0,5-тен 1 г-ға дейін, немесе инфекцияның пайда болуы ерекше қауіп төндіретін хирургиялық араласулар кезінде 3-5 күн бойы.

Операция алдындағы кезеңде дозаны енгізу сарысу мен тіндердегі антибиотиктердің тиісті деңгейін қамтамасыз ету үшін операция басталғанға дейін 30-60 минут бұрын уақтылы жүргізілуі маңызды, одан өзге инфекция қаупі болған жағдайда сарысу мен тіндерде цефазолиннің талапқа сай мөлшерін қамтамасыз ету үшін препаратты операция кезінде тиісті аралықпен енгізу керек.

Пациенттердің ерекше топтары

Бүйрек функциясы бұзылған ересек пациенттер

Бүйрек функциясы бұзылған ересектерге кумуляцияны болдырмау үшін дозаны түзету қажет. Дозаны төмендету қандағы препарат деңгейін анықтауға негізделуі мүмкін. Егер бұл мүмкін болмаса, доза креатинин клиренсінің мәніне қарай есептеледі.

Бүйрек функциясы бұзылған жағдайда тиісті бастапқы дозаны тағайындау керек. Кейінгі дозалануы бүйрек функциясының бұзылу дәрежесіне, инфекцияның ауырлығына және қоздырғыштың сезімталдығына байланысты болуы керек.

Гемодиализдегі пациенттерде емдеу режимі диализ жағдайларына байланысты.

Сәбилер (1 айдан асқан) және балалар

3-4 қабылдауға тең бөлінген 25-50 мг/кг жалпы тәуліктік доза ауырлық дәрежесі орташа инфекцияларда тиімді. Ауыр инфекциялар кезінде жалпы тәуліктік дозаны 100 мг/кг дейін арттыруға болады.

Бүйрек функциясы бұзылған балалар

Бүйрек функциясы бұзылған балаларға (ересектер сияқты) дозаны түзету қажет болуы мүмкін. Дозаны төмендету қандағы антибиотик деңгейін анықтауға негізделуі мүмкін. Егер бұл мүмкін болмаса, дозаны келесі нұсқауларға сәйкес креатинин клиренсін есептеу негізінде анықтауға болады. Бүйрек функциясы бұзылған жағдайда тиісті бастапқы дозаны тағайындау керек. Кейінгі дозалануы бүйрек функциясының бұзылу дәрежесіне, инфекцияның ауырлығына және қоздырғыштың сезімталдығына байланысты болуы керек.

Шала туылған нәрестелер мен 1 айға дейінгі сәбилер

Шала туылған нәрестелер мен 1 айға дейінгі сәбилерде қолдану қауіпсіздігі анықталмаған, бұл пациенттерде цефазолинді қолдану ұсынылмайды.

Егде жастағы пациенттер

Бүйрек функциясы қалыпты егде жастағы пациенттерде дозаны түзету қажет емес.

Енгізу жолы және тәсілі

Вена ішіне (сорғалатып және тамшылатып), бұлшықет ішіне. Бір бұлшықет ішіне енгізу үшін 500 мг-нан аспайтын цефазолинді қолдану керек. Құрамында анестетик бар цефазолин ерітінділерін ешқандай жағдайда вена ішіне енгізуге болмайды.

Дәрілік препарат ерітінділерін дайындау

Бұлшықет ішіне енгізу үшін 1 г препаратты натрий хлоридінің изотониялық 4-5 мл ерітіндісінде немесе инъекцияға арналған суда ерітеді. Алынған ерітіндіні бұлшықетке терең етіп енгізеді.

Вена ішіне сорғалатып енгізу үшін препараттың бір реттік дозасын

0.9 % натрий хлоридінің изотониялық 10 мл ерітіндісінде сұйылтып 3-5 минут бойы баяу енгізеді.

Вена ішіне препаратты тамшылатып енгізген кезде 0.9 % натрий хлоридінің изотониялық 100-250 мл ерітіндісінде немесе 5 % декстроза ерітіндісінде сұйылтып, 20-30 мин бойы енгізеді (енгізу жылдамдығы 1 минутта 60-80 тамшы).

Құты ішіндегісін сұйылтқан кезде толық ерігенге дейін жақсылап сілку қажет.

Қабылдау уақыты көрсетілген қолдану жиілігі

Енгізу жиілігі - тәулігіне 2-4 рет.

Емдеудің орташа ұзақтығы 7-10 күн.

Симптомдары: ұйқышылдық, парестезия, бас ауыруы, ұстамалар болуы мүмкін, әсіресе бүйрек жеткіліксіздігі бар пациенттерде. Артық дозаланғанда зертханалық көрсеткіштердің өзгеруі: қан сарысуындағы креатинин деңгейінің жоғарылауы, функционалдық бауыр тесттерінің өзгеруі, Кумбстың оң сынамасы, тромбоцитоз, тромбоцитопения, эозинофилия, лейкопения, протромбин уақытының ұзаруы.

Емі - симптоматикалық ем. Ауыр дозалану жағдайында, әсіресе бүйрек жеткіліксіздігі бар науқастарда гемодиализ және гемосорбция қолданылады.

Дәрілік препараттың бір немесе бірнеше дозасын жіберіп алған кезде қажетті шаралар

Сипатталған жоқ.

Тоқтату симптомдары қаупінің болуына нұсқау

Сипатталған жоқ.

Дәрілік препаратты қолдану тәсілін түсіндіру үшін медицина қызметкерінің кеңесіне жүгіну бойынша нұсқаулар

Препаратты қолдану бойынша сұрақтар туындаған жағдайда емдеуші дәрігерге немесе дәріхана қызметкеріне хабарласыңыз.

Жиі

- аллергиялық тері реакциялары (мультиформалы эритема, есекжем, қышыну);

- диарея, жүрек айнуы, құсу, тәбеттің төмендеуі, метеоризм, іштің ауыруы.

Жиі емес

- тромбоцитопения, нейтропения, лейкопения, эозинофилия, агранулоцитоз, гемолиздік анемия;

- аса жоғары сезімталдықтың ауыр реакциялары (ангионевроздық ісіну, дәрілік қызба);

- АСТ, АЛТ, сілтілік фосфатазаның уақытша елеусіз жоғарылауы;

- флебит, тромбофлебит.

Сирек

- қан ұюының бұзылуы, қан кету;

- интерстициялық нефрит және басқа бүйрек аурулары.

Өте сирек

- өмірге қауіп төндіретін анафилаксиялық шок;

- қайтымды гепатит, холестаздық сарғаю.

Белгісіз (қолда бар деректер негізінде бағалау мүмкін емес)

- ұзақ мерзімді емдеу немесе қайталап қолдану суперинфекцияның дамуына немесе төзімді бактериялармен немесе зеңдермен (ауыз кандидозы, генитальді монилиаз) колонизацияға әкелуі мүмкін;

- бас ауыруы, бас айналуы, парестезия, қозу, миоклония, құрысулар;

- жалған жарғақшалы колит.

Жағымсыз дәрілік реакциялар туындаса медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаларды қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей хабарласыңыз

Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК

http://www.ndda.kz

Қосымша мәліметтер

Бір құтының ішінде:

белсенді зат – натрий цефазолині (цефазолинге шаққанда) 1 г.

Ақ немесе сарғыш реңкті ақ түсті ұнтақ.

1 г белсенді заттан резеңке тығындармен герметикалық тығындалған, алюминий қақпақшалармен немесе пластмасса қақпағы бар біріктірілген алюминий қалпақшалармен қаусырылған сыйымдылығы 10 мл түссіз шыны құтыларда.

Әрбір құтыға өздігінен желімденетін заттаңба жапсырылады.

1 құты медициналық қолдану жөніндегі қазақ және орыс тілдеріндегі нұсқаулықпен картон қорапшаға салынады.

50 құты медициналық қолдану жөніндегі қазақ және орыс тілдеріндегі нұсқаулықпен картон қорапқа салынады.

Қорапқа заттаңбалық немесе жазу қағазынан жасалған заттаңба немесе өздігінен жабысатын заттаңба жапсырылады.

3 жыл.

Жарамдылық мерзімі өткеннен кейін қолдануға болмайды!

Жарықтан қорғалған жерде, 25С-ден аспайтын температурада сақтау керек.

Балалардың қолы жетпейтін жерде сақтау керек!

Рецепт арқылы.

«Синтез» ЖАҚ, Ресей, 640008,

Қорған обл., Қорған қ., Конституция даңғылы, 7-үй

Тел.: +7 (495) 646-28-68

E-mail: info@binnopharmgroup.ru

«Синтез» ЖАҚ, Ресей, 640008,

Қорған обл., Қорған қ., Конституция даңғылы, 7-үй

Тел.: +7 (495) 646-28-68

E-mail: info@binnopharmgroup.ru

«LEKARSTVENNAYA BEZOPASNOST (Лекарственная безопасность)» ЖШС,

050047, Қазақстан Республикасы, Алматы қ., Алатау ауданы, Саялы шағын ауданы, 16 үй

Тел.: +7 (777) 064-27-02

E-mail: adversereaction@drugsafety.ru, info@binnopharmgroup.ru