Ангиноваг спрей орал. по 20 мл (флакон)

Ангиноваг

Жоқ

Жергілікті қолдануға арналған спрей

Респираторлы жүйе. Тамақ ауруларын емдеуге арналған препараттар. Тамақ ауруларын емдеуге арналған басқа препараттар.

АТХ коды R02АX

- ауыз қуысы мен жоғарғы тыныс жолдарының инфекциялық-қабыну ауруларын: тонзиллитті, фарингитті, ларингитті, афтоздық және ойық жаралы стоматиттерді, глосситті жергілікті емдеу үшін

Қолдануды бастағанға дейін қажетті мәліметтер тізбесі

- белсенді заттарына немесе қосымша заттарының кез келгеніне жоғары сезімталдық

- ауыз қуысының шырышты қабығының ауыр зақымданулары бар пациенттерге

- 13 жасқа дейінгі балаларға

Қолдану кезіндегі сақтандыру шаралары

Ауыз қуысының микрофлорасын өзгертуі мүмкіндігіне байланысты, 10 күннен ұзақ қолданбаған дұрыс.

Ангиновагтың әрбір ингредиентінің концентрацияларының және ұсынылатын дозасының төмендігіне орай, жүйелі әсерімен байланысты жағымсыз құбылыстар күтілмейді.

Визуальді аномалиялар

Көрудің бұзылулары кортикостероидтарды жүйелі және жергілікті қолданғанда туындауы мүмкін. Егер пациентте бұлыңғыр көру немесе көру қабілетіндегі басқа аномалиялар сияқты симптомдар көрініс берсе, пациент катарактаны, глаукоманы немесе орталықтық сероздық хориоретинопатия (ОСХР) сияқты сирек ауруларды қамтуы мүмкін ықтимал себептерін бағалау үшін офтальмологқа жүгінуі тиіс, олар туралы кортикостероидтарды жүйелі және жергілікті пайдаланғаннан кейін хабарланған.

Қосымша заттар туралы ескертулер

Ангиновагтың құрамында ақырғы көлемі 89,385% этанол бар. Әр бүркуде шамамен 0.075 г этанол болады, ол педиатрияда 13 жасқа дейінгілерде, жүкті әйелдерде және бауыр аурулары бар, маскүнемдікке шалдыққан, эпилепсиясы, ми зақымданулары бар пациенттерде қолданғанда қауіпке себеп болуы мүмкін.

Құрамында этанол барын ескере отырып, маскүнемдік, эпилепсия, бассүйек-ми жарақаттары кезінде қолдану ұсынылмайды.

Қант диабеті бар науқастарға тағайындағанда сақтық таныту керек, өйткені препараттың құрамында натрий сахаринаты бар.

Препарат терінің тітіркенуін тудыруы мүмкін, өйткені оның құрамында пропиленгликоль бар. Спрейді көзге тигізбеу керек.

Спортшылардың пайдалануы

Ангиновагтың құрамында гидрокортизон ацетаты бар, допингке тест нәтижесі оң болуы мүмкін.

Новокаинмен, тыныштандыратын препараттармен бір мезгілде қолдану ұсынылмайды.

Этанол

Құрамында этанолдың болуы кейбір препараттардың әсерін өзгертуі немесе күшейтуі мүмкін.

Эноксолон

Әдебиеттердегі деректерде жануарларда жүргізілген зерттеулерге сілтемелер берілген, оларда эноксолон мен гидрокортизонды бір мезгілде жергілікті қолдану гидрокортизонның теріге әсерін күшейтеді. Сондай-ақ, оның жүйелі сіңуі мен уыттылығын күшейтетін-күшейтпейтіндігін анықтау мүмкін болмады.

Деквалиний хлориді

Оның биожетімділігінің төмендігіне байланысты, деквалиний хлоридінің фармакокинетикалық қасиеттерін, оның дәрілік препараттармен өзара әрекеттесуі ықтималдығын немесе оның метаболизмі мен шығарылуын бағалау үшін зерттеулер жүргізілмеді. Жануарлардан алынған деректердің және оның клиникада қолданылуының ауқымды тәжірибесінің негізінде, пациенттерде деквалиний хлоридінің биожетімділігі төмен болады деп күтіледі.

Гидрокортизон ацетаты

Құрамында кобицистатты қоса, CYP3A тежегіштері бар препараттармен бір мезгілде емдеу жүйелі жағымсыз құбылыстардың қаупін арттырады.

Өзара әрекеттесулерін зерттеулер жүргізілген жоқ. Ангиновагтың дозасы мен енгізілу тәсіліне байланысты, жүйелі түрде енгізілетін дәрілік препараттармен өзара әрекеттесулері өте аз деп есептеледі.

Тиротрицин

Тиротрициннің антисептикалық әсеріне байланысты, құрамында клостридиопептидаза немесе оның аналогтары бар препараттармен пайдалануға тыйым салынады.

Лидокаин гидрохлориді

Лидокаинмен белгілі өзара әрекеттесулер Ангиновагтың пероральді қолданылуына қатысты емес, әйтсе де, препараттың құрамында оның болуына байланысты, келесілерді ескеру керек:

- Бета-адренорецепторлардың блокаторлары бауырлық қан ағымын, сәйкесінше, лидокаин метаболизмінің жылдамдығын төмендетеді, ол уыттылық қаупінің жоғарылауына алып келеді. Циметидин бауырдағы лидокаин метаболизмін тежеуі мүмкін, ол уыттылық қаупінің жоғарылауына алып келеді.

- Амидтік типті басқа жергілікті анестетиктерге айқаспалы сезімталдық тудыруы мүмкін.

- Мексилетин және прокаинамид сияқты, аритмияға қарсы III класты препараттар, фармакокинетикалық немесе фармакодинамикалық өзара әрекеттесулерінің ықтималдылығына байланысты.

- Р450 CYP1A2 және CYP3A4 цитохромының изоферменттері лидокаиннің фармакологиялық белсенді метаболиті MEGX түзілуіне қатысады, сондықтан, флувоксамин, эритромицин және итраконазол сияқты басқа препараттар, лидокаиннің плазмадағы концентрациясын арттыруы мүмкін.

Ангиновагтың жүктілік немесе бала емізу кезеңінде қолданылуы жөніндегі клиникалық деректер жоқ.

Жүктілік

Ангиноваг препаратын жүкті әйелдердің қолданғаны жөнінде деректер жоқ немесе шектеулі.

Жүктілік кезінде Ангиноваг препаратын қолдану ұсынылмайды.

Бала емізу

Лидокаин емшек сүтімен бөлініп шығады. Дегенмен, Ангиноваг препаратының бала емізу кезінде қолданылуы бойынша зерттеулер жүргізілмеді. Лидокаин бауырда салыстырмалы түрде жылдам және толығымен дерлік метаболизденетіндіктен, емдік дозаларында емшек сүтіне лидокаиннің өте төмен деңгейлері экскрецияланады деп күтіледі. Емшек емудің бала үшін пайдасын және емдеудің анасы үшін пайдасын ескере отырып, бала емізуді тоқтату немесе Ангиноваг препаратымен емдеуді тоқтату туралы шешім қабылдау қажет.

Препараттың көлікті немесе қауіптілігі зор механизмдерді басқару қабілетіне ықпал ету ерекшеліктері

Құрамында 0.075 г этанол барын ескере отырып, автокөлік немесе басқа, қауіптілігі зор механизмдерді басқарғанда сақтық таныту қажет.

Дозалану режимі

Ересектер мен 13 жастан асқан балаларға.

Қолданар алдында тамақты сумен шаю керек.

Екпінді дозасы әр 2-3 сағат сайын 1-2 бүркуден, демеуші дозасы – әр 6 сағат сайын 1 бүркуден. Емдеу курсын дәрігер жекелей белгілейді. Емдеу ұзақтығы әдетте, 1 аптадан аспайды.

Дұрыс қолдану үшін, пероральді аппликатор зақымданған аймаққа бағытталатындай етіп, құтыны тік қалыпта салу ұсынылады, бірақ ауыз қуысына түгел енгізбеңіз. Қалпақшасының үстіңгі бөлігін жоғарыдан төмен қарай басыңыз. Орнатқаннан және қолданғаннан кейін пероральді аппликаторды құтыдан ағытпаңыз.

Пациенттердің ерекше топтары

Балалар

Ангиновагтың 13 жасқа дейінгі балалардағы қауіпсіздігі мен тиімділігі анықталмады.

Бүйрек жеткіліксіздігі бар пациенттер

Бүйректің ауыр жеткіліксіздігі бар пациенттерде препараттың шығарылуы қиындауы мүмкін. Сондықтан, ондай пациенттерде дозасын түзету қажет болуы мүмкін.

Бауыр жеткіліксіздігі бар пациенттер

Бауырдың ауыр жеткіліксіздігі бар, бауыр функциясы төмендеген пациенттерде, гидрокортизонның метаболизденуі мүмкіндігіне кепілдік беру үшін, жекелей дозалау қажет болуы мүмкін.

Енгізу әдісі мен жолы

Орофарингеальді пайдаланылады.

Дұрыс пайдалану жөніндегі нұсқаулар:

Аузыңызды кең ашыңыз. Бүріккіштің бір түтігін зақымданған бөлікке (тамақ, ауыз, тіл және т. б., егер қатысы бар болса) бағыттаңыз.

Бөтелкені тік қалпында ұстап тұрып, қақпақтың үстіңгі бөлігін түбіне дейін басыңыз.

Құтыда бүріккіш-клапаны болады: қақпағын түбіне дейін әрбір басқан сайын дәрінің дозаланған мөлшері ағып шығады.

Егер бөтелке жаңа болса немесе бірнеше күн бойы пайдаланылмаса, алғашқы бірнеше спрейді ауаға шығарыңыз.

Қабылдау уақыты көрсетілген қолдану жиілігі

Екпінді дозасы әр 2-3 сағат сайын 1-2 бүркуден, демеуші дозасы – әр 6 сағат сайын 1 бүркуден.

Емдеу курсының ұзақтығын емдеуші дәрігер анықтайды.

Артық дозаланған жағдайда қабылдануы тиіс шаралар

Артық дозалану жағдайлары тіркелмеген.

Дәрілік препаратты қолдану тәсілін түсіну үшін медицина қызметкерінен кеңес алуға  бару жөнінде нұсқаулар

Дәрілік препаратты қолдану бойынша сұрақтар болған жағдайда емдеуші дәрігерге жүгіну қажет.

Ангиноваг препаратын немесе оның әсер етуші заттарының кез келгенін қолданғанда келесі жағымсыз құбылыстар байқалған.

Көру мүшелері тарапынан бұзылулар:

Сирек: бұлыңғыр көру

Иммундық жүйенің бұзылуы:

Жиілігі белгісіз: аса жоғары сезімталдық, аллергия (есекжем, эритема, экзантема, қабыну, бөртпе, қышыну, ісіну)

Жағымсыз дәрілік реакциялар туындаған кезде медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаны қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей жүгіну қажет

Қазақстан Республикасы Денсаулық сақтау министрлігі Медициналық және фармацевтикалық бақылау комитетінің «Дәрілік заттар мен медициналық бұйымдарды сараптау ұлттық орталығы» ШЖҚ РМК

http://www.ndda.kz

Қосымша мәліметтер

100 мл препараттың құрамында

белсенді заттар - деквалиний хлориді 0.1 г, тиротрицин 0.4 г, β–глициррет қышқылы 0.06 г, гидрокортизон ацетаты 0.06 г, лидокаин гидрохлориді 0.1 г,

қосымша заттар: пропиленгликоль, ананас майы, натрий сахаринаты, этанол 96 %.

Мөлдір, түссіз немесе ақшыл-сары түсті, өзіне тән иісі және ананас дәмі бар ерітінді.

20 мл препараттан тығыздығы жоғары полиэтиленнен жасалып, полипропилен қақпақпен тығындалған ақ түсті құтыларға құйылады.

1 құтыдан қондырмасымен және медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салады.

4 жыл.

Жарамдылық мерзімі өткеннен кейін қолдануға болмайды.

30°С-ден аспайтын температурада сақтау керек.

Балалардың қолы жетпейтін жерде сақтау керек!

Рецептісіз

Феррер Интернасьональ, С.А.,

Joan Buscallà 1-9, 08173 Sant Cugat del Vallès, Barcelona, Spain

Хуан Бускалья, 1-9, 08173 Сан-Кугат-дель-Вальес, Барселона, Испания

Тел: +34 93 504 40 00,

факс: +34 93 674 20 72

эл пошта: comunicacion@ferrer.com

Феррер Интернасьональ, С.А.,

Gran Via Carlos III, 94, 08028 Barcelona Spain

Гран Виа Карлос III, 94, 08028 Барселона, Испания.

Тел: +34 93 504 40 00,

факс: +34 93 674 20 72

эл пошта: comunicacion@ferrer.com

Қазақстан Республикасы аумағында тұтынушылардан дәрілік заттардың сапасына қатысты шағымдарды (ұсыныстарды) қабылдайтын және  дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

«Ацино Каз» ЖШС

Қазақстан Республикасы, 050047, Алматы қаласы, Бостандық ауданы, Нұрсұлтан Назарбаев даңғылы, 223 үй, 243 т.е.

Телефон нөмірі: +7 727 364 56 61

Электронды пошта: PV-KAZ@acino.swiss